Muanna Veng hun a thleng ta

Volleyball tuichilhna hmun Muanna Veng an beidawng duh lo a, veng chhung thawhhona ṭha chuan an volleyball thiamna chu chawi nungin an phu ang ngeiin LBS Suzuki 21st Inter Branch YMA Volleyball Tournament mipa inelnaah an champion.

Thawhlehni zan khan R. Dengṭhuama Hall, Mualpuiah CYMA Volleyball-a la champion ngai lo pahnih Muanna Veng leh Zawlnuam ten final an khel a, inelna hnuhnung ber finalist Muanna Veng chuan 3-1 (25-18, 20-25, 25-22, 25-7) in hnehna an chang.

Boruak nung

Mizoram Volleyball Association leh CYMA ten ṭha takin inelna an buatsaih a, hun vawn dik kawngah erawh hmasawnna tur a awm, tournament tluanin an tlai deuh char char a ni. Chutihrualin Muanna Veng ṭantu mipuiten final nghakin an zai rual a, boruak a nawm miau avangin ṭan tlai vanga ning hmel hmuh tur a awm lo.

Final an ṭan a, first set-ah inum tawk viau mah se Muanna Veng inrintawkna tichhe tur khawpin Zawlnuam an talna pha lo a, champion tura rinkai zawkin 25-18 in set hmasa ber an la.

Second set-ah Zawlnuamin bul an ṭan ṭha a, Pro Volleyball best player nilai Ramnunfela hoin 8-2 in hma an hruai hman a. Muanna Veng an ṭang tlai hret a, Zawlnuamin 25-20 in set hnihna an la.

Set thumnaah Muanna Vengin inrintawkna an hloh a, Zawlnuam ṭantute a ṭhat bawkin an inchai tawk a, 19-18 te nichho mah se a tawpah player nei ṭha zawk Muanna Veng an dingchang. Zawlnuam innghahna Ramnunfela'n ball a hlap tam a, player hmuhnawm ber zinga mi ni mah se a tha sen tamna ber set thumna an lak si loh avangin ṭang tur a awm tawh lo.

Muanna Veng chungnunna a lang zui a, nuam sa takin set lina chu 25-7 in an la. Semifinal ang thoin Sedraka a khel ṭha a, ani hi man of the match-ah thlan nawn a nih bakah best spiker-ah thlan a ni. Team pahnih danglamnaa ngaih theih chu setter Lallianthanga a ni a, Muanna Veng setter hian pressure sang a ngam hle.

Veteran player Lianthangpuia'n a ho thei chu Muanna Veng vanneihna a tih theih a; captain Sedraka, Lallungmuana leh Lalpekliana te zuan a zâng a, libero atana hman Lalrinthanga a che rang bawk a, chak phu zawkin nomawi an chawi. Zawlnuam chak lo mah se he team hian fak an phu a, an vawi khat telnaah final an thleng a, Aizawl khaw pawn team an ni nachungin ṭantu an nei ṭha hle.

Vengchhung ṭanrualna

Muanna Veng coach Lalzawmliana chuan, "Tun ṭum hi ṭantu kan neih ṭhat ber ṭum a ni a, hetiang ang ṭantu hi ṭum dangah kan nei lo. Vengchhung ṭanrualna rah liau liau a ni a, Local Council aṭangin thlawpna kan hmu ṭha a, kan lawm hle a ni. Ṭum dangah pawh tun aia ṭhaa team inpuahchahna neih ṭhat ṭumte a awm a, amaherawhchu tun ṭum ang renga thawhhona ṭha an awm erawh ka hre lo," tiin khawtlang an ṭanrual thu Vanglaini a hrilh.

Player chungchang sawiin Zawma chuan, "Tun ṭuma player inlante hi player naupang tak tak a ni hlawm a, heng player-te hi Mizoram huapa ṭha turin kan chher ang," tiin tualchhung volleyball hmasawnna tura ke pen zel an tum thu a sawi.