Aizawl FC coach thar Raikhan

I League club Aizawl FC chuan nimin khan Gift Raikhan chu coach atana an lakluh thu an puang. Season liam taa Neroca coach hian Mizo club-ah hian kum khat chhung atan contract a ziak.

Coach inthak kual
AFC hian nikum khan Paulo Meneses hoin season bul an ṭan a, Portuguese coach hi I League-ah result a neih ṭhat tawk loh avangin an ban.

Santosh Kashyap lalutin ONGC leh Royal Wahingdoh coach hlui ho hian Mizo club-in season an khar a, I League-ah pangana niin Super Cup-ah quarterfinal an lut a, AFC Cup-ah point li hmuin group stage an paltlang lo.

Aizawl FC technical director Hmingthansanga chuan, "Santosh hi coach ṭha tak a ni a, a training a ṭhat bakah thawhpui pawh a nuam. Amaherawhchu player te hian a khelh dan hmang hi an hrethiam chiah lo a, an pawmpui miau loh avangin chhawr zui a rem ta lo a ni," tiin Kahsyap-a contract an pawhsei loh chhan Vanglaini a hrilh.

An duh tak
Neroca chuan I League an vawi khat khelhnaah champion lai Aizawl FC khelmualah hnehna an chang a, Manipur club enkawltu chu Gift Raikhan a ni.

Raikhan hian Neroca chu I League hruai thleng turin Second Division-ah a champion pui a, season khatnaah pawh pahnihna a nihpui a, chona thar hmachhawn a duh avangin Manipur club nen hian an inṭhaṭhen.

Aizawl FC president Robert Romawia Royte chuan, "Kan duh tak kan lalut thei hi kan lawm hle a ni. Amah hi tlangmi ve tho a ni a, Mizo player enkawl tur hian kan nunphung hre chiang hi kan duh a, Raikhan hi a chhannaah kan ngai. Ani nena chona thar hmachhawn kan châk tawh hle," tiin Vanglaini a hrilh.

AFC coach thar Raikhan hian Neroca a enkawl hmain Pune FC Academy te a enkawl tawh a, Pune FC-ah pawh Dutch coach Mike Snoei thachhangdawltu a ni tawh bawk. Raikhan hian thla thar aṭang hian Mizo club hi training a pe ṭan ang.

Engtin zel?
MFA hnuaia transfer window hmasa zawk chu June thla hi a ni a, Aizawl FC hian MPL season hnuhnung pahniha Chanmari leh Chhinga Veng champion puitu captain Lalrinchhana Tochhawng chu an lalut tawh a, Santosh Trophy hnuhnung bera Mizoram captain bakah hian Ramhlun North aṭangin winger Jesse Laldinpuia an lalut tawh bawk.

Aizawl FC hian Alfred Kemah Jaryan an chelh thu an tichiang tawh a, I League an khelh dawn avangin foreigner hi panga aṭanga paruk an neih a rinawm a, MPL4 hnuah Raikhan-a hoin Mizoram chhunga football inelna sang berah champion an tum dawn a ni.