Chhungkua a hun hman a hlu - Mary Kom

Mary Kom pawh coronavirus venthawn thil thu vangin ni 14 chhung atan khung hran a ni a, Indian boxer lar hian tunlai boruak rit tak chu chhungkuaa hun hman khawm theihna hun ṭha tak a nih thu a sawi.

Mary Kom hi Jordan-ah Asian Olympic Qualifier khelin a zin chhuak, a rawn haw hnuah ni 14 chhung chu Delhi-ah khung hran a ni dawn. Tunah chuan tibuaitu nei loin chhungkuain hun an hmang mek. Kum 37 mi Kom chuan, "Inah ka taksa ka sawizawi a, ka fitness a ṭhat reng theih nan theihtawp ka chhuah. Thla khat deuh thaw ka fate nen kan inhmuh loh hnuah kan infiamho leh thei tawh.

"Khung hran ka nihin zalenna hlutzia ka hmu thiam, min khung hran vangin hrehawm tuar kher lo mah ila zalen taka mahni duh lam lam hawi theih kha a hlutzia ka zir chhuak thar," tiin a sawi. Manipuri boxer chuan sawi zawmin, "Ka inkhung hran hun hi tun thla tawp thleng a ni, chumi chhung chuan ka fate nen tibuaitu nei miah lohin infiamna hun kan nei, chiang taka ka hmuh chu ka fate hi ka kianga an awm chuan an hlimin hmuh an nuam," a ti.

Mary Kom hi Tokyo Olympic khel turin a inhnek tling leh tawh a, world champion vawi nga ni tawh hian inrintawkna sang tak nen nipui laia infiamna khawmpui lian neih tur hi a hmachhawn ang.