Man United thuam thar nan Fred

Manchester United chuan Thawhlehni khan Frederico Rodrigues de Paula Santos chungchangah Shakhtar Donetsk nen an inrem thu an puang. Brazilian midfielder Fred tia hriat lar man zat hi pound maktaduai 47 niin ziah a ni a, thuthang awm ṭantirha a man zat tura tarlan £52m aiin a hniam hret dawn niin a lang.

Kum 25 mi Fred hi World Cup khel tur Brazil squad-ah a tel a, Selecao coach Tite chuan player-te chu inelna ṭan hmaa an khelhna tur tichiang hma turin a ngen a, Brazilian midfielder pawh hian mimal contract a ziahfel thuai beisei a ni a, he thu i chhiar meuh chuan a tifel thei tawh bawk.

United hian kum 19 mi Diogo Dalot chu tunkar chho hian an lakluh hmel a, FC Porto defender release clause hi £17.4m a ni. Portuguese defender-in United a zawm a nih chuan dinhmun chiang lo sa Italian full back Matteo Darmian leh Dutch defender Daley Blind te an chhuah a rinawm lehzual ang.