Djokovic leh Zverev an liam

Novak Djokovic leh Alexander Zverev te chu French Open aṭanga vuak tlak an ni ta. Roland Garros champion ni thei tura rinkai pahnih hi Marco Cecchinato leh Dominic Thiem an ngam loh avangin an tan semifinal-ah hmun a awm ve lo.

Thawhleh zan mipa singles quarterfinal inkhelah world number 1 hlui Djokovic hi world number 72 Cecchinato lakah 6-3, 7-6 (7-4), 1-6, 7-6 (13-11) in a chak lo a, inkhel pakhat zawkah seeded pahnihna Zverev chu Thiem hmaah 6-4, 6-2, 6-1 in a tlawm ve bawk.

Thiem hian a zawna a vawi thum nan French Open semifinal a khel dawn a, a khingpui tur Cecchinato tan erawh Grand Slam quarterfinal paltlang hi thil thar a ni satliah lo, tun hmain Paris-ah hian main draw (inelna tak) chinah chak ni hmel a la hmu ngai lo a ni.

A mak a na

Grand Slam vawi 12 champion tawh Djokovic hi a kiu hliam vangin tun hnaiah a buai fo a, mahse a hliam a dam tawh avangin Paris-ah hian rinkai zingah a tel phak. Quarterfinal lut tur hian set khat chiah a hloh a, 2016 US Open hnua a vawi khat nan major tournament-ah semifinal a lut leh ngei tura ngaih a ni hman.

Mahse, Court Suzanne Lenglen-ah beisei ang ngawtin thil a kal bik lo. Serbian tlangval hian Cecchinato lakah set hmasa ber an khelh laiin winners vawi thum chiah a vaw chuak a, Italian tlangval service a chelh lo hle bawk. Set thumna bikah nuamsa takin chak mah se set dang pathumah chuan hun pawimawh lai taka chesual zawkah a ṭang zel.

Kum 31 mi Djokovic chuan, "Marco khan tennis ropui taka a khelh avangin chak a phu a, ka lawmpui hle. A tir aṭangin a talbuai zawkah ka ṭang a, set lina kan khelh laiin 4-1 a hmahruai tawh chunga min pawtthla thei kha ka thiam loh a ni," a ti. Djokovic hian a hriselna ngaihtuahin Wimbledon a khel ngei dawn em tih a sawi chiang thei lo.

Chak lo zawk Djokovic tan a na a, hnehna changtu Cecchinato tan erawh chuan thil mak a ni thung. Cecchinato hi 2016 khan match-fixing vangin match 18 chhung inkhel thei loa hrem a ni tawh a, tunah chuan Italian tlangval zingah 1978 hnu lama Grand Slam semifinal lut leh thei hmasa ber a ni leh ta. Djokovic hma hian player langsar dang David Goffin leh Pablo Carreno Busta te a hneh tawh bawk.

Kum 25 mi Cecchinato chuan, "Ka ball vuak let hnuhnung ber khan line a va fuh chiah a, ka hun tawn tawh zinga hlimawm ber a ni hial ang. Novak Djokovic hneh chung ngeia French Open semifinal luh hi chu beisei aia sang a ni tawh," a ti. 1999 khan Andrei Medvedev chu world number 100 ni chungin Roland Garros-ah a thiam pali zingah a tel tawh a, ani hnuah Cecchinato hi ranking hniam ber a ni.

Zverev a chau

World number 3 Alexander Zverev-a'n a zawna match thum chhung set nga a khelh hnuah Dominic Thiem a hmachhawn a, German rawlthar Zverev tan tun hnai season hnih chhunga clay court-a Rafael Nadal hneh thei awmchhun Thiem chu a khawng lutuk hret a, darkar khat leh minute 50 chhungin a chak lo.

Kum 21 mi Zverev hian set hnihna an khelh laiin a malpui a ti na a, inkhelh chhung zawngin beisei a phak lo chhunzawm. Tunlai player chhuak thar beiseiawm pahnih hi Nadal-a rorelna rawn ṭhiat thei tura rinkai an ni a, quarterfinal lut turin Zverev hian court chhungah darkar hnih leh a chanve vel ngawt a hmang hnem zawk - match ṭhenkhat aiin a rei zawk!

Austrian tlangval Thiem chuan, "A nihna takah chuan Zverev hi player thahrui nei ṭha berte zinga mi a ni a, mahse a zawna set nga a khel kha a tuar niin ka hria. Kan pahnih hian kum dangah match hmuhnawm zawk kan la lantir leh ngei pawh ka beisei," tiin ropuina ram thleng thei tura a elpui ber tur a nihzia a hrechiang hle.

World number 2 Zverev hi player beiseiawm ni mah se Grand Slam erawh kar khat chhunga khelh zawh a ni ve lo a, a hun chhung hi ATP Masters dangte aiin a let thawka a rei zawk avangin thleng sang tur chuan tha a khek thiam a ṭul. Thiem-a'n inkhelh hma lama a sawi angin tawnhriat a ngah zawkna a hmang ṭangkai.