Arsenal defender thar Stephan Lichtsteiner

Stephan Lichtsteiner chuan Juventus aṭangin Arsenal a zawm. Switzerland international defender hian Turin club tan a contract neih a hmang zo a, Gunners manager Unai Emery chuan sum hmang loin tlarhnung thuam ṭhat nan tawnhriat nei ṭha player a la lut tihna a ni.

Kum 34 mi Lichtsteiner hian Italian club lian Juventus tan season sarih chhungin match 257 a khel a, a zawnin Serie A nomawi vawi sarih an chawi theih nana player pawimawh a ni a, Coppa Italia title vawi li a la hman bawk.

FIFA World Cup-ah Lichtsteiner hi an ram captain a ni dawn, a tawnhriat neih tawhte chu Arsenal player naupang zawk tana ṭangkai tura beisei a ni a. Emery chuan, "Stephan hi thil a ṭha lama ngaihtuah mi a ni a, an tawnhriat leh hruaitu a nihna hi a ṭangkai ang. Khelmual chhung leh a pawnah hmasawnna a thlen ngei ang," a ti.

Arsenal hian defender rinrawl Laurent Koscielny chu hliam vangin season tir lamah an chhawr thei dawn lo. France international awm lai pawhin an tlarhnung a phui tawk loh avangin manager thar Emery chuan thuam phui tumin hma a la nghal chat. Lichtsteiner bakah hian Borussia Dortmund defender Sokratis Papastathopoulos pawh an hnaih tawh hle.

Grasshopper Zurich leh Lille tan pawha khel tawh Lichtsteiner hian mual sir dinglamah Hector Bellerin nen khelhna hmun an inchuh dawn a, Spanish player Bellerin tan zirlai tam tak a siam thei ngei ang.

Ram tana match 99 khel tawh Lichtsteiner chuan, "Rim taka thawk chungin inelna lian Champions League pawh kan khel leh ngei ang," tiin season thara Europa League khel tur Arsenal chu Emery kaihhruaina hnuaiah UCL huanga an kir leh a beisei thu a sawi.

Nomawi chungchang sawi zawmin Lichtsteiner chuan, "Juventus-ah pawh khan hnungtawlh leh duhthusam loh lai chu a awm ṭhin, kan manager tur Emery hi nomawi chawi hnem tawh a ni a, player chherhriam thiam tak a nih bawk avangin hlawhtlinna kan chan theih a rinawm," a ti.