Jeje & Sunil: India striker inkawp fuh ber?

Hero Intercontinental Cup khelh mek a ni a, India chuan zanin dar 8:00 hian New Zealand nen an league match hnuhnung ber an khel dawn.

India tana player langsar chu ṭum dang ang bawkin Sunil Chhetri leh Jeje Lalpekhlua te an ni a, sawi rik ni fo ṭhin 'Indian striker inkawp fuh ber" tih chu a ri nawn leh ta.

Match hnih khelh tawhah Chhetri-a'n goal nga a khung tawh a, Jeje-a'n goal khat khungin assist vawi hnih a nei tawh bawk.

Chhetri chuan, "Jeje a awm chuan ka tan hnathawh a awlsam lehzual ṭhin," a ti a, Mizo tlangval nena khelhdun nuam a tih thu a pha lo.

Khelhpui nuam

Indian midfielder langsar Eugeneson Lyngdoh chuan, "Jeje hi Indian player-ah chuan khelhpui nuam ka ti ber," tiin Vanglaini hnenah a lo sawi tawh a, Chhetri-a'n a ṭawmpui bawk.

Kum 33 mi striker chuan, "Chinese Taipei laka ka goal khung pahnih kha Jeje-a min siamsak a ni. Player chak ṭha tak a nih avangin defender-in dan harsa an ti ṭhin a, chu chuan ka tan hna a ti awlsam em em ṭhin a ni," a ti.

Tun hmain Chhetri leh Bhaichung inkawp chu striker inkawp fuh ber pawla ngaih a ni a, Bhaichung-a'n Chhetri a kaihruai ṭhin angin vawiina Chhetri hi Jeje hmasawn nana player pawimawh a ni.

Bhaichung hian Indian football tan Jeje leh Chhetri inkawp chu ṭha a tih ber thu a lo sawi tawh a, Vanglainiin player pahnih an khelh dunna a zirchianna aṭangin Sikkimese thusawi dikna a lang.

Inkawp fuh

Jeje Lalpekhlua'n kum 2011-ah India tan a match hmasa ber a khel a, ram tan a match hmasa pathumah goal li ngawt a khung thei - heng match pathumah hian Chhetri nen an khel dun vek.

Indian striker ṭha pahnih hian ram tan match 36-ah inkhel bul an ṭan dun a, goal an khung zat chu 45 a ni. Striker pahnih an khelh dunin India-in match 23-ah hnehna an chang a, match sarihah tlawmin match rukah an khingpui an inhnehtawkpui.

Starting XI-a Jeje leh Chhetri an awma India win percentage hi 63.88% a tling a, striker pahnih inkawp hi India-in a chhawr tih hai rual a ni lo. Jeje-a'n Chhetri nen an khelh dunin goal 19 a khung a, Bengaluru striker hian goal 26 a khung thung.

Striker pahnih an khelh dun tawha goal an khung tlem ber ṭum chu 2013 kha a ni a, match li an khelh dunah Chhetri-a'n goal hnih a khung laiin Jeje-a'n a khung lo thung. Striker pahnihin starting XI-a hmun an chan duna goal an khung hnem ber chu 2011 kha a ni a, match 14 aṭangin goal 18 an khung.

Ropuina ramah...

Jeje-a'n India tan match 49 a khel tawh a, goal 22 a khung tawh. Hnahthial tlangval hian ram tana match 50 khel kai turin match khat chiah a mamawh tawh a, zaninah a inlan a nih chuan India tan match 50 a khel tling chiah dawn tihna a ni.

Intercontinental Cup-a India squad-ah Chhetri-a'n ram tan match 100 khel tawhin India tana inlan ngun ber a ni a, India captain hnaih bertu chu Jeje a ni.

India-in final an luh chian tawh avangin zaninah erawh Jeje hi chawlh hahdamtir a nih rin a ni a, June 10 zana final an khelh hunah ram tan a match 50-na a khel tling chiah ang.

Zanina India hmachhawn tur New Zealand hian Thawhlehni zan khan Myer Bevan penalty chhuih luh hmangin Chinese Taipei chu 1-0 in an hneh a, zaninah India an hneh chuan final luh beiseina an nei thar thei dawn - Mumbai Football Arena-a inkhel tur hi ticket hralh zawh a ni tawh!