Liverpool-in Melwood an chhuahsan

Premier League champion Liverpool chuan kum 70 chuang training ground atana an hman tawh Melwood chu an chhuahsan a, Liverpool khaw daifema pound maktaduai 50 senga an sak AXA Training Centre, Kirby-ah an insawn tawh dawn a ni. 

Liverpool training ground thar hi 99,000-square-feet-a zau a ni a, khelmual pathum a awm a, indoor sports hall, gym pahnih, swimming pool, hydrotherapy leh sports rehabilitation hmunte a awm a, tunlai thiamna hmangin a changkang thei ang berin an duang. 

Reds manager Jurgen Klopp chuan, "Kirby lam training ground thara kan kal thei tur hi ka lawm a, chutihrual chuan Melwood kan chhuahsan tur hi hrehawm ka ti takzet a ni," tiin a lunglen thu a sawi. 

Liverpool legend leh Rangers manager ni ta Steven Gerrard chuan instagram-ah Melwood thlalak pholang chungin mangṭhana thu a ziak a, Jamie Carragher, Ian Rush, Michael Owen, Fernando Torres, Sir Kenny Dalglish, Luis Garcia, East Bengal coach ni ta Robbie Fowler leh Liverpool tana lo khel tawh tam takin Melwood mangṭhana hi an ziak bawk. 

Reds coach ropui Bill Shankly-a'n kum 1950 chhoa training-na hmun ṭha tak ni tura a din chhoh Melwood hi transformation group Torus chuan an lei a, mipui chenna hmun ni turin an siam danglam dawn a ni.