World Cup-ah India an mualpho nawn

T20 World Cup-a champion tura rinkai zinga mi India chu match hmasa pahniha mualpho taka an chak loh avangin tla thei dinhmunah an ding. Virat Kohli kaihhruai Men in Blue hian Pathianni khan New Zealand chu wicket riat ngawtin an hneh lo.

Dubai International Stadium-ah ṭhumvawra vannei New Zealand-in vawm hmasak an thlang a, India-in 110/7 chauh an siam. Black Caps hian over 14.3 lekah 111/2 runs siamin awlsam takin hnehna an chang.

A tlem mah mah
India tan Dubai International Stadium hi thil thar a ni tawh lo a, Indian Premier League khelhna hmuh a ni. Chu chauh a ni lo a, Pakistan laka an mualphona hmun a nih avangin anni aia hre chiang tur an awm lo.

Black Caps lakah hian ṭhumvawrah an vanduai a, hei hian inkhelah nghawng lian tak a nei nachungin chhuanlam a tling lo - semifinal luh an duh a nih chuan chak a ṭul.

Mahse, Suryakumar Yadav aia luhtir Ishan Kishan-a shot selection a fuh lo a, run riat chauh a siam tihin pavilion-ah a kir. KL Rahul (18), Rohit Sharma (14), Virat Kohli (9), Rishabh Pant (12) te pawh eng ruai an ni lo a, New Zealand bowler-te bakah fielder te an che ṭha takzet.

All rounder Hardik Pandya (23) leh Ravindra Jadeja (26*) te zarah 110/7 an tlin hram a, Dubai-ah run siam har mah se chakna tur khawp a tling pha lo a, run an siam tlem mah mah.

An chak awlsam
India bowler chhuanvawr Jasprit Bumrah-a'n bul rawn ṭan chhe lo mah se Martin Guptill-a'n a insiamrem hnuah ball 17 aṭangin 20 runs a siam. Guptill-a ball vuak Shardul Thakur-a'n a man danah Indian player-ten inrintawkna an tlachham tih a chiang a, mipui beiseina sang tak avanga an chunga pressure awm leh IPL vanga hahchawlhna hun an nei lo chuan harsatna hi a belhchhah niin a lang bawk.

Black Caps tan Daryl Mitchell (49) leh captain Kane Williamson (33*) te an che ṭha a, over 14.3 lekah 111/2 runs siamin awlsam takin hnehna an chang. Williamson chuan, "Player-te huaisenna a fakawm a, bowler-te chet ṭhat rah kan seng. A bik takin Sodhi che ṭha khan nasa takin hnehna chan kawngah min pui a ni," tiin a sawi.

Hmabak chu
India hian November 3, Nilaini zan dar 7:30 hian Afghanistan an hmachhawn dawn. Afghanistan hian Pathianni khan Namibia an hneh a, Pakistan leh New Zealand hneh lo India hi chak chiangsaa dah a rem tawh lo.

Chutihrualin India tan semifinal luh beiseina nei tur chuan New Zealand chetsual a ṭul dawn a, Black Caps hian Nilaini tlai dar 3:30-ah Scotland an hmachhawn thung ang.