Atalanta-ah Man United fiahna
Zanin dar 1:30 hian Atleti Azzurri d'Italia-ah Atalanta-in Manchester United an mikhual dawn. Champions League group F inkhel dangah Villarreal-in Young Boys an mikhual ve bawk ang.
Man United tan knockout stage lut turin Italian club laka point hmuh a pawimawh a, Ole Gunnar Solskjaer tan a hna chelh chhunzawm turin result ṭha bakah game ṭha a mamawh.
Fiahna chu
Man United-in September thla tawp leh October thla chhungin result ṭha an nei meuh lo. West Ham-in League Cup aṭangin Solskjaer-a hote hi an pet tla a, Premier League-ah an la mualpho zawk.
Red Devils hian Aston Villa leh Leicester City an hneh lo a, Everton nen an inhnehtawk. Man United ṭantute hriatthiam loh ber erawh an hmelma Liverpool lakah 5-0 in an tlawm a, Norwegian manager ban duhtu an tam hle.
Mahse, Ole-a'n Man United thuneitu duhsakna a dawng a, chance ṭha an la pe. Kar liam ta khan Man United hian formation thar 3-5-2 nen Tottenham Hotspur 3-0 in an sawp a, an inkhel a nung bawk. Amaherawhchu Ole hi fiahna dangin a la hmuak a, zanina Atalanta an hmachhawn tur leh kartawpa Manchester City nena an inkhel turte chu inkhel pawimawh bik a ni.
Inkhel tur chu
Spurs an hneh ṭumin hrem vangin Paul Pogba a khel thei lo a, French midfielder tel lo hian Man United an khel ṭha. Chutihrualin Pogba theihna thlir chuan Solskjaer-a'n khelh theih dan tur a siamsak a nih pawhin a mak lo ang.
Norwegian manager hian Atalanta chauh ni loin Man City nena an inkhel tur a thlir tel a ṭul dawn a, Fred emaw Scott McTominay emaw te awl thei dinhmunah an ding. Tlarhmaah Edinson Cavani leh Cristiano Ronaldo te an inkawp rem a, amaherawhchu player pahnih kum belhkhawm hi kum 70 a nih tawh avangin chhawr thiam a ṭul dawn.
Man United player-te an dam kim a, chumi awmzia chu Marcus Rashford, Mason Greenwood, Jadon Sancho leh Anthony Martial te chhawr thei vek an ni. Mahse, khelh dan nghet an la neih loh avangin ban theih dinhmuna ding Solskjaer-a'n player a thlak danglam tam ngam a rinawm lo a, defender pali aiin defender panga a hman nawn a rinawm bawk.
Atalanta erawh an inhmachhawn hmasak ṭum ang thoin hliam vangin an buai a, Man United an mikhual hunah Berat Djimsiti, Robin Gosens, Rafael Toloi, Matteo Pessina leh Hans Hateboer te an khel thei dawn lo. Chutihrualin hriat tel tur erawh Italian club hian Old Trafford-ah 2-0 in hma an hruai hman a, Ronaldo ropui zan an tawn avang chauhin kut bengin an haw.