Sangtea'n nuai 3 chuang a hnek chhuak ; Zonet-in inhnek aṭanga an chan tur Rs 1,20,750 chu boxer hnenah a zavaiin an hlan

Zonet-in Dubai Fight Night aṭanga an sum hmuh zawng zawng chu Lalrinsanga Tlau hnenah an hlan. October 23, Inrinni zan khan Dubai-ah Sangtea hian technical knockout hmangin Georgian boxer Ilia Beruashvili a hneh a, Mizo boxer hian Zonet thilpek, PPV leh sponsor aṭangin Rs 2,15,150 a chang.

Mizo professional boxer hmasa ber Sangtea hi Indian boxer zinga PPV aṭanga share nei hmasa ber a ni a, Mizo chauh ni loin Indian boxer-te tan hmasialtu pawimawh a ni.

Sangtea chan
WBC youth champion Sangtea hian Grassroot Boxing Promotions and Management-ah contract a nei mek a, an inremnaah hian PPV leh sponsor aṭanga 10% a chan tur thu ziah tel a ni.

Zonet thuchhuakin an tarlan danin Dubai Fight Night tihchhuah aṭanga Zonet chan hi 15% a ni a, hei hi Head Office leh Distributor ten 7.5% ve vea an insem leh tur a ni. Sangtea inhnek puala Zonet sum hmuh zawng zawng hi Rs 8,05,000 a ni a, Zonet chuan an chan tur Rs 1,20,750 chu Mizo boxer hnenah an hlan.

Zonet baka Sangtea te inhnek tihchhuahna Book My Show aṭangin Rs 1,39,000 a lut a, Mizo boxer hian 10% (Rs 13,900) a chang. Mizo boxer hi inhnek aṭanga a hlawh ni lo, a chhehvel aṭanga a sum lak belhkhawm hi Rs 2,15,150 a ni.

Zonet chuan, "PVV kaltlanga Sangtea te fight lo en tu zawng zawngte chungah lawmthu kan sawi a, Sangtea pawh duhsakna sang ber kan hlan," tiin thuchhuah an siam.

Inhnek hlawh
Khawruhlian tlangval Sangtea hian professional fight vawi sarih a hmachhawn tawh a, ṭum khat erawh box rec-ah ziahluh a nih loh avangin official-a a inhnek zat chu vawi ruk a ni.

September 22, 2019 khan Sangtea hian Delhi-ah Digari Mahesh a hmachhawn a, a bul ṭannaah hian hlawh a nei lo. G Mallikharjuna leh Haidari Mchanjo te Bangalore leh Dubai-a a hnek ṭumah Rs 10,000 leh Rs 20,000 a hlawh.

Aizawla title fight a hmachhawn hma khan Mumbai-ah Prince Mojesh Shrivastava a hneh a, hemi ṭum hian hlawh a nei lo. WBC youth title-ah khan Sangtea hian dollar 500 a chang a, Eric Quarm-a'n dollar 4500 a chang.

Sangtea hian official-a fight panga a hmachhawn aṭangin Rs 67,000 bawr vel a dawng. Chutihrualin WBC youth title a hmachhawn ṭum hian Mizoram sports minister Robert Romawia Royte hnen aṭangin cheng nuai riat a dawng.

October thlaah khan Sangtea hian euro 50 (Rs 4,330.33) leh dirham 3,000 (Rs 6,1187.89) a dawng a, fighter of the night a thlan a nih avangin dollar 1,000 (Rs 74920.50) a dawng leh bawk. Dubai aṭanga inhnekna bik aṭanga a sum hmuh hi Rs 1,40,400 bawr vel a ni a, PPV leh sponsor aṭanga a sum hmuh nen phei chuan inhhnek vawi khatah Rs 3,55,500 bawr vel a hmu chhuak.

Hmabak chu
Grassroot Boxing Promotions and Management hian 75% an chan avangin Rs 6,03,750 an chang pha a, chutihrualin anni hi Sangtea mamawh zawng zawng petu an ni thung. Mizo boxer-in Dubai-a inhnek a neih theih nana zinna leh thlenna hotel zawng zawng buaipuitu an ni a, Cuban boxing coach ṭha thlengin an pe a, sum senna tur an ngah hle.

Grassroot Boxing dintu Mujtaba Kamal chuan, "Sangtea hi Indian boxer zinga PPV leh sponsor aṭanga 10% share nei hmasa ber a ni a, Indian number 1 Faizan Anwar pawh khan share a nei lo. Tunah hian December thlaa inhnek nei leh thei turin kan buatsaih mek a, kar ruk chhung training turin Dubai-ah a awm mek a, India ram pawnah a inhnek ang," tiin Vanglaini a hrilh.

Professional boxing aṭanga sum hmu tam turin hming chher hmasak a ṭul a, hemi a nih avang hian boxer-te hian an bul ṭannaah sum lalut mang loa an inhnek hmasak a ṭul ṭhin. Sangtea pawh hian record a neih ṭhat chhoh chuan boxing aṭanga a sum hmuh chauh ni loin PPV leh sponsor aṭanga a sum hmuh hi a pung chho zel ang.