Vienna Open champion Zverev

Pathianni zana khelh zawh tak Vienna Open-ah Alexander Zverev a champion. German tlangval hian Frances Tiafoe chu 7-5, 6-4 in a hneh a, tennis season kal laiah nomawi panga a hlawhchhuahna chiah a ni bawk.

Kum 24 mi Zverev-a'n American tlangval lakah harsatna langsar a tawk lem lo. Olympic champion Zverev hian set pahnihah hian a khingpui service vawi thum a chhuhsak a, ṭum khat a service hloh ve mah se buaina tham a ni hran lo.

Wimbledon khelh lai khan Zverev hi fourth round-ah Felix Auger-Aliassime hneh loin a tla, a hnu lamah erawh a insiam ṭha ta hle - match 25 a khelh leh tawh aṭangin vawi hnih chiah chak loh a nei.

World number 4 Zverev chuan, "Ka tan chuan season duhawm leh danglam bik tak a ni. Olympic champion ka ni a, hei bakah hian ATP 500 leh Masters title pahnih ve ve ka la bawk," tiin a season hman danah a lungawi hle.

Zverev hi player ṭha leh theihna nei sang bikte zinga mi a ni. Amaherawhchu Grand Slam nomawi chawi a harsat, final hial thleng tawh mah se a la vannei tawk lo, season tharah chuan beiseina sang zawk nen major tournament a khel ngei ang.