Barca: Tawpna ni a hnai an ti!

Football ngainatute tan men rei a ngai leh ta - zaninah Champions League inkhel pawimawh a awm nual dawn a, chung zingah chuan zan dar 1:30-a Barcelona inlan tur hi ngaihven hlawh zual zinga mi a ni.

Ronald Koeman an ban hnua coach nghet la nei lo Barca hian khualmualah Dynamo Kiev an lenchilh dawn a, match thum an khelh tawh aṭanga point thum chiah la nei team hi an tlawm a nih chuan Europa League lam mitthla a fuh ṭan ang.

Group E-a match thum an khelha la chak fai vek Bayern Munich pawh zanin dar 1:30-ah vek an inlan dawn a, point li hmu tawh Benfica an mikhual dawn avangin a awlsam lo ang.

Chutihrual chuan Bayern hi point kua an neih tawh avangin an tlang chiang tawh anga ngaih theih a ni a, Benfica erawh point li leka ngaihngam chi an la ni lo.

Barca hi
Catalan club-in beisei ang result an neih theih loh avangin coach Koeman an ban a, mahse, Dutch coach an ban hnua an match hmasa berah Alaves chu 1-1 in an inhnehtawkpui!

Barca president Joan Laporta chuan, "Koeman kha ban hma tur zawk kan ni. A tirah chuan thlawp a mamawh niah kan ngai a, mahse, kan hniam zel si a ni," a ti a, Koeman an lo ban har lutuk chu pawi a tih thu a sawi.

Mahse, Barca hian coach lailawk Sergi Barjuan hnuaiah pawh eng an la ang chuang lo a, Alaves nena an inkhel en chuan Catalan club assistant coach hian Koeman-a kalphung a la kalsan lo tih an hmu ang.

Laporta chuan player a nih laia Barca tana vawi 382 inlan thei hi,"Sergi kan nei a, kan club mi leh sa a nih avangin he club kalphung hi a hria a ni. Kan dream team-a khel, kan duh dan hretu a ni," tiin a fak a, Alaves laka an result-in thawnthu dang min hrilh thung.

A har dawn
Barcelona fans tam takin hlauhthawn an nei - Barjuan hoa an khel tur hi an ngaih a ngam lo a, Koeman-a ho ai mahin Barjuan-a hoa Champions League group stage paltlang zawh loh hlauhthawnna an nei lian zawk!

Mahse, Catalan club lawmna turin Ousmane Dembele, Ansu Fati leh Frenkie de Jong ten club training an zawm a, Barjuan-a'n mamawha a inhria a nih chuan a chhawr thei ang.

Barca fan-te tana thlamuanna tur erawh tun season Champions League-a an hneh tawh awmchhun chu Dynamo hi an ni a, an intawn hmasakah 1-0 in an hneh.

Chutihrual chuan an intawnna hmasa hi Nou Camp a ni a, Ukrainian club khelmuala an len tawh dawn avangin a hma aiin a har zawk ang - Barca tan chak loh a thiang lo a, tun hi fan-te beiseina chhem nun sak hun a ni e.

Chhanna pek hun
Bayern-in DFB-Pokal second round-ah Borussia Monchengladbach an ngam lo a, an tlawm satliah mai ni loin 5-0 in an mualpho! German club hian league-ah 5-2 a Union Berlin hnehin an insiamṭha zui a, mahse an rilru a dam kim thei lo.

Thomas Muller chuan, "5-0 a kan tlawma min sawiselna ṭhenkhat kha chu tlemin a uchuak ve deuh. Mahse, artui ang maia keh awlsam kan ni bik lo a, a chang chuan dam taka pawm mai a ṭul a, mahse, petchhuah kan ni tih erawh theihnghilh loh a ṭha," a ti.

Bayern forward hian an mualphona chu Champions League-a chet ṭhat nana hman a duh a, zaninah Benfica an hneh a nih chuan round of 16 an lut chiang dawn - Robert Lewandowski a inlan chuan goal khung kawngah harsatna an nei lo tura ngaih a ni.

Kum 33 mi striker hian tun season inelna hrang hrangah match 15 khelin goal 19 a khung a, assist vawi khat a nei bawk. Zaninah a inlan chuan Champions League-a match 100 a inlanna chiah a ni dawn a, goal nen lawm a duh ngei ang - match 99-ah goal 78 a khung tawh.