Covid-19 do let nan Lewy

Bayern Munich striker Robert Lewandowski leh a nupui Anna te chuan tunlai hri leng lar tak coronavirus do nan euro maktaduai khat an thawh a, Polish striker-te nupa hmalakna hian fak a hlawh hle. 

Lewandowski chuan, "Kan hun tawn khirh tak hi kan hre vek a, team khata kan ṭang ho vek tih kan hriat a ṭul a ni. He hrileng dona kawngah hian thinlung paukhauh tak pu ila, midang kan pui thei a nih chuan, i pui ang u. 

"He thil hian kan vaiin min nghawng vek a, chuvangin a hriate thurawn zawm ila, theihtawp i chhuah tlang ang u," a ti. 

Hetihlai hian Bayern tana Lewandowski-a khelhpui Leon Goretzka leh Joshua Kimmich te chuan Covid-19 do nan hian 'We Kick Corona' chu dinin sum an khawn a, an pahnih hian euro nuai nge ve ve an thawh nghal. 

Manchester City winger Leroy Sane pawhin he pawl tan hian sum engemaw zat a thawh a, a sum thawh zat hi euro nuai nga vel niin an sawi. 

We Kick Corona aṭang hian euro maktaduai 2.5 vel hmuh a ni tawh a, midangte ṭanpui ṭhintu pawlte tan We Kick Corona website kaltlangin sum hi dil theih a ni. Kimmich chuan, "Kan theihna chu a lian emaw a te emaw pawh ni se, kan vaiin tih theih kan nei vek a ni. Inlungrual taka kan thawh ho a, kan tih turte kan tih hian he hrileng hlauhawm lak ata hi kan tal chhuak thei ang," tiin a sawi.