Aguero dinhmun a la chiang lo

Barcelona leh Alaves inkhelh ṭuma thawk lam fel lo avanga lakchhuah Sergio Aguero dinhmun chu chiang taka sawi theih a la ni lo a, Spanish chanchinbu lar Marca tarlan dan chuan a natna tak hriat tumin test neih chhunzawm zel a ni dawn.

Argentine striker Aguero hian Alaves nen an inkhelh ṭumin a thawk lamah harsatna a nei a, khelmuala enkawl a nih hnuah ambulance-in damdawi in lam panpui zui a ni.

Khawthlang media ṭhenkhat chuan Manchester City striker hlui hian arrhythmia (lung phu buai) natna a nei niin an sawi a, kum 33 mi striker hian he natna hi tun hmain a lo nei tawh.

City tana a khelhpui ṭhin Raheem Sterling chuan, "Ka unaupa chhel takin awm rawh, i bulah kan awm reng ania. Lo ṭha thuai ang che," tiin Aguero duhsakna a hlan a, City chuan, "Manchester City chhungkua chuan kan hre reng che, i kiangah kan awm reng e," tiin an legend hi duhsakna an hlan ve bawk.

Barcelona a pan hnuah Aguero-a'n ngai a awh hleithei lo - hliam vanga season bul a ṭan theih loh hnuin match nga a inlanah goal khat a khungsak a, khelmualah minute 165 chiah hun a la hmang.