Spurs-in Nuno an ban

August 2021-ah Premier League manager of the month-a thlan a ni a, November a herchhuah meuh chuan Tottenham Hotspur-in an coach Nuno Espirito Santo an ban thu an puang!

Spurs hi an league match hmasa pathumah an chak vek a, mahse, an match hnuhnung pasarihah vawi hnih chiah an chak. Inrinni zan khan 3-0 in an mikhual Manchester United an ngam lo a, Nuno an ban ta nge nge.

Tottenham managing director of football Fabio Paratici chuan, "Nuno leh a coaching staff ten he club hlawhtlinpui an tumzia ka hria a, he thutlukna siam a ngai ta hi hrehawm ka ti hle a ni," a ti.

Paratici chuan, "Nuno hi patling tak a ni a, he hmunah hian kan lawm reng ang. Amah leh a coaching staff-te chungah lawmthu kan sawi a, an hma hun atan duhsakna kan hlan bawk a ni," tiin a sawi bawk.

Spurs hian Nuno hmun ruak luah tur ruatna an neih thuai tur thu an sawi a, he thu buatsaih laia a lan dan chuan Antonio Conte chu London club enkawl tura hming ri ring ber a ni.

Manchester United nen pawha sawi zawm hlawh tak Conte hi club director Paratici chuan a be nghal a, Italian coach hian Spurs enkawl hi a hreh lo.

Nipui transfer-a Spurs-in lakluh an lo tum tawh Conte hian Spurs a zawm dawn a nih chuan hun rei zawk atana contract pek a duh nia sawi a ni a, transfer bazar a inhawn veleha sum pek a phut bawk.

Paratici hian Juventus-a chief football officer hna a chelh laiin Conte hi a lo thawhpui tawh a, Chelsea boss hlui nen hian an inhriat ṭhat sa avangin Conte hmin thei tura beisei a ni - he thuziak i chhiar meuh chuan an inhmin tawh hial mai thei.