Mourinho-a dan theih loh Ibrahimovic

'Zlatan Ibrahimovic' tih ringawt pawh hi mi tam tak tan chuan a ngaihnawm nghal. AC Milan striker hian AS Roma lakah freekick a chhuih luh bakah penalty a hlawhchhuak a, a club hi 2-1 a hnehna chanpuiin Serie A champion nih an tumzia an lantir.

Pathianni zan Stadio Olimpico-a inkhelah Jose Mourinho nauten tih theih an nei tam lo, an mikhual Milan hi Zlatan hoa thawk chhuak an nih maiu avangin hun rei tak chhung player tam zawkin khel mah se Roma an tlawm ta tho.

Hei le Ibra
Season tirah khan hliam vangin Ibrahimovic a inlan thei lo, a lo kir leh hnuah a mikhual lo hle - goal a khung chhunzawm leh ta reng mai. Roma lakah pawh hian minute 25-na lekah freekick a chhuih lut, league hrang hranga a goal khung zat belhkhawm chu goal 400 a tling ta!

Second half-ah Ibra hian penalty a hlawhchhuak a, midfielder Franck Kessie chuan an goal hnihna atan a khung - Milan hi nuamsa taka chak tura ngaih ni mah se, minute 66-naah Theo Hernandez chu hnawhchhuah a ni a, hun tawp lam minute 24 chhung tlem zawk ni chungin an khel.

Tlem zawk mah se Stefano Pioli naute an talbuai duh lo, hun tawp dawnah Stephan El Shaarawy-a'n Roma tan goal khat khung ve zeuh mah se awmzia a nei phak tawh lo a, khualmual aṭangin point thum hlu tak an hlawh chhuak.

Milan hian tun season an league match hmasa 11 aṭangin ṭum 10 ngawt hnehna an chang tling ta. Roma, Juventus (vawi 2) leh Napoli (2) te hnung zuiin Italian football inelna sang bera season bul ṭan fuh an ni.

Thilmak titu
'Uain ṭha mi ang ka ni' tia lo sawi tawhtu Ibrahimovic chuan, "Tun hma aṭang tawhin thilmak ka thlen tir tawh ṭhin. Hmalam kan thlir reng tur a ni a, hlawhchhamna kan tawhte pawh hlawhtlinna hmahruai a ni tih kan hriat a ngai ve bawk.

"Player zawng zawng kan khel ṭha vek. Inrintawkna kan nei sangin kan duh ang takin kan khel chhuak thei kha a lawmawm. Roma kha tun season-ah chuan anmahni muala tlawm la nei lo an ni a, mahse a khel ṭha zawk kan nih avangin kan chak," tiin a sawi.

Ibra hi kum 40 mi a ni tawh, inkhel zawng zawngah rinrawl ni vek tur chuan a thain a tlin tawh bik lo, hliam leh harsatna hrang hrangin a tlak buak ve fo bawk. Mahse a dam ṭha a nih chuan striker hriam leh hlauhawm tak a la ni reng.

Mou a lawm lo
Milan an lawm laiin Mourinho erawh a lawm lo. Roma manager chuan, "Engmah ka sawi lo ang, a nih loh chuan min hnawtchhuak leh mai ang," tiin referee chunga a lawm loh thu a sawi, kar hmasa khan red card an lo pe tawh a ni.

Potuguese manager chuan sawi zawmin, "Kan theihna zawng zawng kan hlan a, mahse kan vanduai. Theihtawp kan chhuah chunga fans lam aṭanga kan phu ang tawk zahna kan dawng lo khan min tilawm lo," tiin fans chet dana a lawm loh thu a sawi leh ta hmiah mai.

Mourinho hi Inter Milan a enkawl lai leh Roma a enkawl hnuah, anmahni muala league match an khelh bikah a tlawm ngai lo - match 43 chhung a kaltluang thei. Mahse, tunah chuan Ibra leh Milan lakah a record ṭha tak hi a tawp ta.