Moyes-a enkawl West Ham an sang zel

David Moyes kaihhruaina hnuaiah West Ham chuan hmalam an pan zel. Europa League chauh a ni lo - Premier League lamah pawh Hammers hi team hmuhnawm an ni, tunah chuan a sang zual pali zingah an tel phak.

West Ham hian Pathianni zan khan Aston Villa chu 4-1 in an luhchhuah a, league match 10 khelh aṭanga point 20 hmuin table-ah palina an ni; champion lai Manchester City nen an point neih a inzat.

Hammers tana Ben Johnson khung chu Ollie Watkins-a'n sut mah se, chawlhlawk hmain Declan Rice hmangin mikhual lamin an goal hnihna an nei leh hman - minute 50-naah Ezri Konsa chu hnawhchhuah a ni a, chak zawk tur a chiang zui nghal.

Tam zawk an nih hnuah West Ham hian Pablo Fornals leh Jarrod Bowen te hmangin an khung belh a, striker Michail Antonio leh Manuel Lanzini ten remchang an hmuh chhawr ṭangkai thei lo mah se an mamawh zat goal an nei.

Kum 58 mi Moyes hian manager a nih hnuah a naute match 999 a kaihruai tawh. Ningani zana Genk nen Europa League an khelh hunah mellung pawimawh bik a phun thei dawn, a kum la tam lo mah se team enkawl lamah erawh tawnhriat a nei hnem tawh hle.

Season 23 chhungin Moyes-a'n Everton, Manchester United, Real Sociedad leh Sunderland bakah West Ham hi ṭum hnih a enkawl tawh a, a thlen chin hi a ropui tawh hle, hmabak erawh tam tak a la nei.

Nikum lama che ṭha tak Villa erawh an la kal fuh hlei thei lo. Point 10 chauh an la hmuh avangin 15-naah an awm a, goal 19 zet chhuah tawhin goalkeeper Emiliano Martinez hoa an vanneihna khan a kiansan rih.