Basque derby-ah Sociedad chak zo lo

La Liga hmahruaitu Real Sociedad-in Athletic Bilbao nen Basque derby an khel a, hun pek belha an goalkeeper Alex Remiro chet sual vangin an mikhual nen hian 1-1 in an inhnehtawk.

Minute 58-naah Sociedad defender hlui Inigo Martinez chuan a club hlui lakah penalty a chawi a, Alexander Isak chuan harsatna nei loin goal-ah a chantir.

Martinez hi minute 84-naah a yellow card pahnihna a hmuh avangin hnawhchhuah zui a ni a, league hmahruaitu Real Sociedad hi an chak mai dawn niin a lang hman tawh.

Mahse, hun pek belh minute khatnaah Iker Muniain chuan mawi zetin freekick a pet a, Sociedad keeper Remiro chuan hnekchhuah tum mah se a tisual a, ball-in woodwork a per hnuah a lut.

La Liga match hmasa bera Barcelona laka an tlawm hnuin Sociedad hi league-ah an tlawm leh tawh lo a, inelna hrang hrangah match 14 chhung chu tlawm an nei tawh lo.

Bilbao lakah pawh hnehna chang zo lo mah se table chung ber an luah chhunzawm zel a, league match 12-ah point 25 an nei tawh. Sociedad hian anmahni hnaih bertu Real Madrid aia match khata khel tamin point khatin an sang zawk mek a ni.