Martinez faktu Pochettino

Mauricio Pochettino chuan tun hnaia Barcelona nena sawi zawm hlawh tak Lautaro Martinez chu a dah sang hle a, khawvela striker ṭha berte zingah a tel phak thu a sawi chhuak.

Kum 22 mi Martinez hi Antonio Conte kaihhruai Inter Milan-ah khelin player pawimawh a ni, season kal laiah inelna hrang hranga match 31 a khelh aṭangin goal 16 a khung a, a ṭhiante khung tur vawi li a siamsak tawh bawk a ni.

Martinez hian European club lian dang chil a ti put mek a, club lian amah duhtu zingah Barcelona pawh sawi rik a ni. San Siro-ah kum thum daih contract a la neih avangin la chhuak tur erawh chuan sum sen hnem a ngaih hmel.

Argentine manager Pochettino chuan, "Lautaro Martinez hi khawvela striker hriam berte zinga mi a ni. Hmasawn zel turin tih tur a la nei a, club lian dangin an beisei avangin amah pawh a ṭang leh zual ngei ang tih chu ka ring.

"Kan khelhna club tan kan rinawm tur a ni a, chutihrualin club lian danga chona thar hmachawn pawh player tam takin an chak bawk ṭhin a ni. Tunah erawh chuan atan Inter hi hmun ṭha a ni, Italian club tan hian Romelu Lukaku nen an inkawp rem em em a ni," tiin a sawi. Spurs nen an inṭhen hnuah Poch hian hna thawh a la nei rih lo, European club lian ṭhenkhat chuan manager atan an awt, an ram Argentina team enkawl tur angin thawm a awm bawk - tunah erawh a hma hun a la tichiang 

rih lo.