Covid-19 in Dybala a luhchilh

Coronavirus hri lengin zuah bik a nei lo a, Juventus star Paulo Dybala chuan he hri leng a kai thu hi social media kaltlangin a puang chhuak ve leh ta. Argentine forward hian a bialnu Oriana Sabatini nena an thlalak chu instagram lamah a pho chhuak a, Covid-19 an kai thu leh ngaihtuahawm erawh an nih loh thu a sawi. 

Kum 26 mi forward chuan, "Oriana nen coronavirus kan kai tih hmuhchhuah a ni a, mahse vanneihthlak takin kan dinhmun erawh ngaihtuahawm a ni lo," a ti. Juventus player zingah centre back Daniele Rugani chu he natna kai hmasa ber a ni a, France midfielder Blaise Matuidi chu pahnihna niin Dybala hi a pathumna a ni ta. Dybala bialnu Oriana Sabatini hi Argentine zaithiam lar, lemchan thiam leh model a ni a, US Open champion hlui Gabriela Sabatini-a tunu a ni. Argentina international Dybala hi Juventus tana a khelhpui Miralem Pjanic, Cristiano Ronaldo leh Matuidi te chuan dam thuai tura an duhsakna an hlan.