Maradona dinhmun a ṭha

A thluak an zai vanga enkawl lai Diego Maradona chu a dinhmun a ṭha a, hun rei vak lo hnuah damdawi in a chhuahsan thei dawn niin amah enkawltu doctor Leopoldo Luque chuan a sawi.

Luque chuan, "Diego-a'n an in lama haw a duh tawh a, a dinhmun hi endika ngaihtuah leh mek a ni. Engtikah nge damdawi in a chhuahsan theih dawn la chiang lo mah se a rei tawh lo ang," a ti.

Barcelona, Napoli leh Boca Juniors tana khel tawh Maradona hi player a nih laiin ropui viau mah se team enkawl lamah erawh a ropui lo, a nungchang ṭha lo leh ruihhlo tihna nghawng chuan a taksaah nghawng ṭha lo a nei fo - tun thlengin a buai phah mek zel.

Maradona hian 1986 khan FIFA World Cup-ah Argentina chu nomawi a chawipui a, a hnu lamah an ram hi world champion an la ni leh lo - an ram mai bakah khawvel mi tam takin footballer ropui berah an ngai hial.