Substitute dan thlak a rinawm loh - Premier League chief

Premier League chief executive Richard Masters chuan substitution panga an hman a rinawm loh thu a sawi. Europe inelna lian dang La Liga, Serie A, Bundesliga leh Ligue 1-ah te substitution panga hman vek a nih laiin Premier League-ah erawh substitution pathum hman a ni.

Liverpool manager Jurgen Klopp leh Manchester City manager Pep Guardiola te chuan player inhliam tur ven nan substitution tih belh a ṭul thu an sawi a, Premier League thuneitute beng thleng pha mah se thutlukna erawh an sawh sawn a rinawm loh.

Richard Masters chuan, "Substitution chungchangah ṭum hnih vote lak a ni tawh a, heng ṭum hnihah hian club aiawhten substitution pathum hman an duh ve ve a ni.

Covid-19 vangin inkhelh tur a tam a, player inhliam an tam bawk avangin thinurna a thlen. An harsatna hi hriatthiampui mah ila tun hnai maiah chuan thutlukna awm tawh sa hi kan sawh sawn a rinawm loh," tiin a sawi.