Liverpool mualah beiseina nen Atletico

Brighton & Hove Albion laka hnehna chang zo lo Liverpool chu zanin dar 1:30-ah an inlan dawn a, zanina an match khelh tur erawh Champions League a ni.

Anfield-a Liverpool lo vel ṭap tawhtu Atletico Madrid chuan Reds hi an tlawh dawn a, team pahnih tan zanin inkhel tur hi an hma hun hriltu thui tak a ni dawn.

Liverpool-in hnehna an chan chuan last 16 an lut chiang thei dawn a, Atletico tan a thiam 16 zinga tel turin chak ngei ngei a ṭul bawk - an chak zawh loh chuan an dinhmun a him lo ang.

Group B inkhel hmasa zawkah zanin dar 11:15 hian AC Milan chuan FC Porto an mikhual dawn a, last 16 lut turin Milan tan chak ngei ngei a ṭul tawh - Porto hian Atletico angin point li an nei thung.

Boruak 'hot'
February 2020 khan Champions League last 16-ah team pahnih an lo intawng tawh a, an intawn hmasak zawkah mualneitu Atlético Madrid-in 1-0 in hnehna an chang a, Saul Niguez chuan inkhela goal awmchhun a khung.

Inkhelh zawhah Jurgen Klopp-a'n a lungawi lohna a tlangaupui a, Sadio Mane a lakchhuah chhanah pawh German coach hian, "Hnawhchhuah a nih theih nan an che a, an bul hnaia thawk a lak nat deuh chuan an tlu mai ang," a ti a, Atletico player-te chu Mane-a card hmuh nana cheah a puh.

Diego Simeone-a chak lawm dan uchuak tak pawh Klopp-a'n a ngai thei lo a, a sawisel. Mahse, German coach hian, "Anfield-ah kan lo lawm dawn che u alawm," tiin Atletico a thlah a, an khelmualah result an thlak danglam a beisei.

Mahse, Anfield-ah Klopp-a beisei a thleng lo. Minute 90 chhung 1-0 in Liverpool chak mah se inkhel pahnih belhkhawmah an inhnehtawk - extra time khelh a ni a, Reds-in goal khat khung belh leh mah se Atletico lamin goal thumin an chhanglet a, 3-2 in an chak.

A na a ni
Wanda Metropolitano-a an result avangin Reds an lawm lo a, result piahlama an boruak zawng zawng nen chuan Atletico laka Anfield-a tlawm hi a nga ngawih ngawih.

Mahse, kum 2021 a herchhuah meuh chuan Champions League-ah team pahnih chu group khatah dah an ni a, Porto leh AC Milan an awm ve bawk avangin 'group of death' tih hial an ni.

Mahse, Reds tan erawh he 'group of death' hi a awlsam a, match thum an khelhah an la chak vek - an hmelma Atletico pawh khualmualah 3-2 in an hneh a, phuba lakin a awm.

Hetihlai hian Klopp-a'n Atletico chungchang a lo sawi tawhna chu media lamah a darh thar a, mahse, German coach hian, "Football Pope ka ni bik hleinem," a ti a, ṭawngkam mawi a hman reng theih bik loh thu a sawi!

Anfield chu le...
Liverpool-in Madrid khawpuiah phuba la tawh mah se Anfield-a thil thleng kha an la theihnghilh hman lo a, kha inkhela player tam zawk kha an la kawl bawk - an mitthlaah Álvaro Morata goal khungte kha a la awm reng ang.

Hei vang hian Reds-in Anfield-a chak leh ngat an duh dawn a, an chak chuan Atletico tan last 16 luhna chance a tlem sawt ang tih pawh an hria - heng zawng zawng thlir hian chak an châk dawn.

Anfield-ah fans sing telin an team an pui dawn a, Atletico hlauhthawnna belhchhah turin away fans ticket an neih tam lo tak pawh hralh an harsat - ticket 200 pawh an hralh tling lo niin khawthlang media-te chuan an tarlang.

March 11, 2020-a Anfield-a team pahnih an intawn ṭum kha Covid-19 darh lehzual chhanah tam takin an ngai a, England-ah phei chuan Covid-19 vanga football khelmualte khar a nih hmaa stadium-a inkhel entu awma inkhel hnuhnung ber a ni - hei vang hian Spanish fan-ten England an la ṭih rih niin a lang.

Liverpool buaina
Reds-in season an hmang ṭha takzet a, league-ah tlawm an la nei lo a, Champions League-ah an la chak vek bawk. Mahse, league-a an match hnuhnung berah Brighton & Hove Albion chu 2-2 in an inhnehtawkpui!

Liverpool hian draw result an nei a ni satliah lo - goal hnih an khung hnuah Brighton chu an si phurh an sut zawhtir. Atletico leh Brighton khaikhin chi an ni lo a, Spanish club hi vawi khat tihsuala an khingpui hrem thei khawpa 'quality' nei an ni.

Jurgen Klopp-a tan fimkhur lehzual a ṭul dawn tihna a ni a, last 16-a an hmun an tihchian hma leh an tan a hahdamthlak dawn tihna a ni mai - zaninah chak ngei a ṭul.

Liverpool hian hliam vangin Naby Keita leh James Milner an chhawr theih a rinawm lo a, hetihrual hian Fabinho leh Thiago Alcantara ten training an zawm leh tawh avangin thlaphanna lutuk tur erawh a awm lo.

Atletico an ṭha
Diego Simeone-a nauten Wanda-a Liverpool an ngam loh hnu khan league match thum an khel leh tawh a, an match hmasa pahnihah Real Sociedad (2-2) leh team naran Levante (2-2) te chu inhnehtawkpuiin an chak zo lo.

Mahse, a hun teah Atletico an rah a, Pathianni zan khan an mikhual Real Betis chu 3-0 zetin an sawp - Yannick Carrasco, German Pezzella 63' (OG) leh Joao Felix ten goal khat ṭheuh khungin an chak chiang hle.

Liverpool lenchilh dawn hnaiha result neih ṭhat hi player-te rilru tihphur nan pawha ṭangkai a ni a, Simeone a lawm khawp ang - zaninah chak tum rilru an pu dawn.

Atletico tan Thomas Lemar leh Geoffrey Kondogbia te inlan theih a rinawm loh a, Liverpool an mikhual ṭuma goal hnih khungtu Antoine Griezmann-a'n Reds lakah red card a hmuh tel avangin zaninah a inlan thei lo bawk ang.

Chak dan hria Suarez
Griezmann inlan theih dawn loh chuan Liverpool striker hlui Luis Suarez mawhphurhna a sang lehzual dawn tihna a ni a, Uruguayan striker hian Reds chak lohna an hriat thu a sawi lang bawk!

Kum 34 mi striker chuan, "Team zawng zawngin chakna leh chak lohna kan nei vek a, counter attack-a Liverpool ṭhatzia pawh kan hria. Mahse, kan chhawr ṭangkai theih tur chak lohna an neih kan hre ve bawk," a ti a, a inringtawk hle.

Suarez hian tun season match 13 a khelh aṭangin goal sarih a khung a, a tlangnel tawhna Anfield-a khel tur a nih avangin goal khung ngei a tum ang - Reds tlarhnung tan ven bik a fuh mai thei.

Mahse, Atletico hi ṭum dang ang lo takin an tlarhnung a phui lo - league-a match 11 an khelh aṭangin goal 10 an chhuah a, season duhawm tak hmangtu, match 13-a goal 15 khungtu Mohamed Salah, Sadio Mane (7 goals), Roberto Firmino (6) leh Diogo Jota (4) te ho an hmachhawn dawn a, tlarhnung ngaihthah a thiang lo.