Spurs boss thar Conte: Premier League a ‘hot' lehzual

Thomas Tuchel, Jurgen Klopp leh Pep Guardiola awmna Premier League-ah Antonio Conte a rawn lut ve leh ta a, English top flight league boruak 'hot' tawh sa a 'hot' lehzual dawn.

Tottenham Hotspur chuan an coach Nuno Espirito Santo an ban hnuah Conte chu an coach thar atana an lakluh thu an puang a, Spurs fans an phur.

Conte hian June 2023 thleng cham turin contract a ziak a, thla 20 chhungin pound maktaduai 20 a hlawh dawn niin an sawi - Premier League coach hlawh hnem pawl a ni dawn tihna a ni.

Kum 52 mi Conte hian May thla khan Serie A nomawi a chawi hnuah Inter Milan a chhuahsan a, nipui lai khan Spurs nen lo indawr tawh mah se a beisei ṭhenkhat an pek theih loh avangin a lo hnar tawh.

Conte chuan, "Coaching-a ka lo kir leh ta hi ka lawm takzet a, a bik takin tum sang tak nei Premier League club-a ka lo kir leh thei hi ka hlim a ni," a ti.

Tu nge Conte?
Football ngainatu inti zingah Conte chanchin inhrilh nawn a ngai lo - football khawvelah chhuan tham sulhnu a nei a, player a nih laia a hlawhtlin ang bawkin coach a nih hnuah pawh a hlawhtling.

Kum 2011-14 inkara Juventus a enkawl khan season tin Serie A nomawi a chawi a, Juve a chhuahsan hnu hian Italy a enkawl bawk. Kum 2016 khan Chelsea a lo enkawl tawh a, English football-ah a mikhual lo.

Blues tan Premier League leh FA Cup-ah champion mah se July 2018 khan ban a ni a, May 2019 khan Inter a enkawl. Italian club tluchhe mek chu tungding lehin Serie A nomawi a chawipui thei.

Spurs pawhin Conte chungah beiseina sang tak an nei ang tih a chiang a, Premier League table-a pakuana ni mek team hian Conte hoin 'top four' an dream ngam leh tawh ang.

Thu lawmawm
Players tan chuan Spurs-in Conte an lalut hi thu lawmawm a tling - Italian coach hian player-te chu a hma aia ṭha zawkah a siam ṭhin tih a ni a, hei hi Italian coach 'special' na a ni.

A awih lo tan Romelu Lukaku, Achraf Hakimi, Lautaro Martinez, Carlos Tevez, Fernando Llorente, Graziano Pelle, Claudio Marchisio, Arturo Vidal, Paul Pogba leh Nicolo Barella te zawh theih an ni e!

Spurs player zingah Son Heung-min, Harry Kane, Dele Alli leh Tanguy Ndombele te chu lawmzual tur an ni - anni ringawt pawh hi Conte-a'n an theihna ang taka khel chhuak tura a tuai hnum thei a nih ngat chuan Spurs tan hlawkna nasa tak a ni ang.

Conte hian player training pawh a neihpui nghal dawn nia sawi a ni a, hetiang a nih chuan Ningani zan Europa Conference League-a Vitesse an mikhual hunah Conte-a'n a ho thei nghal dawn tihna a ni.

Attacking coach
Conte-a'n 3-5-2 formation a hman uar avangin mi tam takin Italian coach hi defensive coach-ah an ngai ṭhin a, a game khelhtir dan a hmuhnawm tawk lo tia sawi thlengin a awm ṭhin.

Mahse, Juventus leh Inter Milan-a a team enkawl dan hmu chuan attacking football khel ṭhin a ni tih an hmu ang a, a hnuaia striker ten hma an sawn ṭhin avangin goal khung ngaina coach a ni tih a hriat theih bawk.

Italian football journalist Nima Tavallaey Roodsari chuan, "Coach duhdan nei nghet tlat, system manager kan tih ang hi a ni. A duh dan anga khelh a duh a, chu a thlir leh duh dan anga player ten an khelhchhuah chuan a hmuhnawm em em zel a ni," tiin Conte a dah sang hle.

Conte-a'n Inter season hnih a enkawl chhung khan Serie A-ah goal 170 an khung a, hetih chhunga Italian top flight league-a goal khung tam lama Inter-in an phak loh awmchhun chu Atalanta chiah an ni.

3-5-2
Conte-a'n a hman thiam sa 3-5-2 rawn hmang ta se eng angin nge player a rem ang tih chu zawhna awm a ni a, Italian coach hian thlasik transfer-ah sum hman tur a neih dawn bawk avangin London club hi an ngaihnawm chho dawn.

Spurs player neih sa ringawt pawh hi coach tan chuan chet ṭhatpui tham an ni - Conte hian 3-5-2 bawk a rawn ring leh dawn a nih chuan tlarhnung pathuma ding turin Cristian Romero, Davinson Sanchez leh Eric Dier te an awm a, player ṭha tak vek an ni.

Full back aṭanga attacking pui turin Sergio Reguilon leh Emerson Royal te an awm a, top player tia sawi tur ni lo mah se Ashley Young leh Victor Moses hmang thiamtu coach hian a hmang thiam em em ang.

Midfield-ah a man to ang hua English football-a la khel chhuak lo Ndombele, Pierre-Emile Hojbjerg leh Giovani Lo Celso an inkawptir thei ang a, hetia han sawi mai pawh hian hlauhawm tham an ni tawh!

Kane & Son
Tottenham player neih ṭhat ber thlang dawn ila Kane leh Son hi lam hmasak ngei tur an ni a, player pahnihin an ṭhat dan bera an khelhchhuah phawt chuan Spurs tan hlawkpui tham an ni.

Nipui transfer-a Manchester City pan a tumna a tlawlh hnuah Harry Kane-a'n ngai a la awh leh lo a, league match kuaah goal khat chiah a la khung.

Conte-a kaihhruaina hnuaiah Kane hian a theihna sang berin a khel leh thei ang tih a chiang a, chutihrual chuan English striker hian lungawi loh reng a thlan tlat chuan Conte-a'n bench-a dah a hreh lo ang - Italian coach hian a thu an awih loh chuan player langsar leh langsar lo a thliar ve lo.

Tun dinhmuna Spurs tana goal khungtu ber chu Son a ni a, kum 29 mi forward hian league match kuaah goal li a khung tawh - hei pawh a theihna en chuan a la tawk lo tih a lang chiang a, Spurs ralthuam neih ṭhatte an chet ṭhat theih nan Conte kutah engkim a innghat e.