Thla thum chhung chawl tur Aguero

Barcelona chuan an striker Sergio Aguero chu thla thum chhung a lung lam fel lo avangin a chawlh tur thu an puang a, kum 33 mi striker hi kar hmasaa Alaves nen an inkhelh ṭumin thawk lam buai avangin lakchhuah a ni.

Khelmuala enkawlna pek a nih hnuah Aguero hi damdawi in panpui zui a ni a, a dinhmun chiang taka puanzar a nih loh reng hnuah Catalan club chuan thla thum a chawlh tur thu hi an puang.

Aguero hian cardiological test a nei a, club thuchhuah chuan thla thum chhung inenkawlin a dinhmunte enfiah a nih reng tur thu an sawi a ni.

Barcelona chuan, "Thla thum lo awm turah hian enkawlna a dawnte a dam zelna tura a a ngeih leh ngeih loh kan thlir dawn a ni," an ti a, Aguero tan Barca-ah hun duhawm a her chhuak hlei thei lo.

Manchester City legend hian City-ah kum 10 hun a hmang a, match 390-a goal 260 khungin club tana goal khung hnem ber record a siam. Mahse, nipui transfer-ah chhuahsanin Barca a zawm a, hliamin a tihbuai bawk avangin match nga chiah a la khelhsak - goal khat a khung tawh.

Barca-a kum hnih cham tura contract neitu striker chuan, "Hlim leh thlamuang takin dam tumin ke ka pen dawn a ni," a ti a, a hlauhthawn loh thu a sawi.