India tan beiseina tlem a la awm

T20 World Cup-ah India-in an match hmasa pahnihah Pakistan leh New Zealand an hneh lo a, Virat Kohli hote tan semifinal thleng turin thilmak a ngai tawh. Zanin dar 7:30 hian India-in Sheikh Zayed Stadium-ah Afghanistan an hmachhawn ang a, tlai dar 3:30-ah New Zealand leh Scotland te an inkhel bawk ang.

India tan NRR ti ṭha turin Afghanistan sawp a ṭul a, semifinal luh beiseina nei tur chuan Black Caps an chetsual a ṭul. New Zealand hian Scotland bakah Namibia leh Afghanistan te an la hmachhawn dawn.

Virat Kohli hote hian Pakistan leh New Zealand lakah 151/7 leh 110/7 runs an siam a, match hniha an chak loh chhanah batter ho a mawhpuh theih. India khingpui tur Afghanistan hi Shaheens leh Black Caps tih loha ṭha ber an ni a, Men in Blue tan chetsual theihna an la ni.

Chutihrualin champion hial inbeisei India tan chak loh a thiang tawh lo a, insiamṭhat ngei a ṭul tawh. India ram mipui beiseina sang tak avangin Kohli hote hian pressure an ngah a, boruak rip tak vai kiang turin ṭhumvawra chak a pawimawh a, hei erawh an kuta awm a ni lo.

India hi an bat hmasa leh a nih chuan KL Rahul, Rohit Sharma leh Kohli te an chet ṭhat a ṭul tawh dawn a, pakhat tal dam rei an awm lo a nih chuan ṭum dang ang thoin an talbuai leh a rinawm. Bowling lamah Jasprit Bumrah a la ṭha reng a, Kohli-a'n pressure sang ngam Ravichandran Ashwin a thlang ngam ang em tih hi zawhna awm chu a ni.