Nadal a lo kir hnai

Rafael Nadal chuan Australian Open 2021 khelh ngei a tum a, inelna lian atana inbuatsaihna turin tournament pawh khelh ngei a tum - December thla hian tennis court-ah Nadal hmel kan hmuh leh theih tawh a rinawm.

Kum 35 mi Nadal hian French Open aṭanga a tlak hnuah match hnih bak a la khel leh lo, tunah hian a ke phah vei lam hliam vanga enkawl mek a ni. October thla kha chuan a lo kir hun tur a sawi thei lo, tunah chuan a beisei hun a sawi thei ta.

Grand Slam vawi 20 champion tawh Nadal chuan, "Ruahman dan chuan December thla hian Abu Dhabi-ah ka inkhel ang, hei hi Australian Open atana inbuatsaihna a ni nghal bawk ang, hei bak chu ruahmanna thar ka la nei rih lo.

"Training ka nei leh thei tawh a, tunah hian a hma ai chuan ka hriselna dinhmun pawh a ṭha tawh. Ka ke hi 100% a dam la ni chiah lo mah se tunah chuan ni khatah darkar khat leh a chanve te ka training thei tawh," tiin a sawi.

Nadal hian Grand Slam nomawi 20 a chawi tawh a, major title lak hnem lamah Roger Federer leh Novak Djokovic te nen an inrual mek. Player pathum hi an la chawl lo vek a, nakkum January thlaa khelh tur Australian Open hi an ngai pawimawh hlawm khawp ang.

Melbourne khawpuia inelna neih ṭhin Australian Open-ah hian Nadal hi 2009 khan a champion tawh, season li dang chu final lut mah se a chak lo zawkah a ṭang vek - ṭum nga ngawt final a thleng thei tihna a ni.