England chakpuitu Buttler

England-in T20 World Cup-a 100% chak record an neih chhawm nung turin Jos Buttler-a'n century a siam a, Thawhṭanni zan khan Sharjah Cricket Stadium-ah Sri Lanka chu 26 runs in an hneh. Three Lions hi match li an khelh tawhah an la chak vek a, semifinal lut turin an dinhmun a ṭha hle.

Ṭhumvawrah Lions an vannei a, vawm hmasak an thlang. England opener Jason Roy chuan run kua chauh a siam a, mahse Australia nena thi loa 71 runs siamtu Buttler bawk a che ropui. Kum 31 mi Buttler hian ball 67 lekah thi loin 101 runs an siam a, chak lo theia ding England chu dinhmun ṭha zawkah a dah.

England batter dang Dawid Malan (6) leh Jonny Bairstow (0) ten Buttler thlawp ṭha lo mah se captain Eoin Morgan a hunah tak a rawn che ṭha a, 40 runs siamin over 20-ah Three Lions-in 163/4 runs an siam.

Sri Lanka opener Pathum Nissanka (1) leh Kusal Perera (7) te chesual mah se Charith Asalanka (21), Bhanuka Rajapaksa (26), Dasun Shanaka (26) leh Avishka Fernando (13) te hmangin chak beiseina an nei a, England pawh an buai hman. Amaherawhchu over 16.5-ah Liam Livingstone-a'n Wanindu Hasaranga a vawm hlum a, hei hian inkhelah nghawng a nei thui hle.

Ball 20 a la awmin Sri Lanka hian chak turin 34 runs siam an la mamawh a, Lions tan chak theihna la awm mah se Buttler-a'n Sri Lanka captain Dasun Shanaka a run out tir avangin England-in awlsam zawkin hnehna an chan theih phah.

England-in over 19-ah Sri Lanka hi 137 runs siamtirin an vawm hlum vek a, 26 runs-in hnehna an chang. Three Lions hian November 6, Inrinni hian South Africa an hmachhawn dawn a, an chak lo a nih pawhin NRR hmangin semifinal an luhna chance a sang zawk.

Group 1 aṭangin England an tlin a rinawm a, Australia leh South Africa ten hmunruak pakhat an inchuh ang. Proteas hian England an la hmachhawn dawn bakah nimin khan Bangladesh an hmachhawn a, an hneh ve ve a ṭul. Aussies-in Bangladesh leh West Indies an la hmachhawn dawn a, South Africa aiin an dinhmun a ṭha zawka ngaih a ni.