SVV 2021 Football C'ship ; Mizoram Yellow Team an champion

Assam Rifles buatsaih Swarnim Vijay Varsh 2021 Football Championship final chu nimin zing khan Lammualah khelh a ni a, Mizoram Yellow-in penalty shootout-ah Mizoram Red 5-3 in an hneh.

Final-ah hian Yellow Team tan Lalhriatpuia'n minute 36-naah penalty aṭangin a khung a, Red Team captain Lalrinzuala Hauhnar-in minute 59-naah siphurh a sut. Hun pangngaiah 1-1 a ni a, penalty-ah Yellow Team an vannei ta zawk.

Inelna hi Mizoramin Santosh Trophy atana inbuatsaihna ṭha zawk an neih theih nana Assam Rifles buatsaih a ni. Mizoram team pahnih bakah Tata Trusts COE leh Bawngkawn GSA te an tel a, October 28, Ningani khan semifinal khelh niin Red leh Yellow team ten team pahnih dang hi an hneh ve ve.

Khuallian sports minister Robert Romawia Royte chuan, "Nakkumah National Games a awm avangin kumin Santosh Trophy hi a pawimawh lehzual. National Games-a kan tel theih nan Santosh Trophy-a chet ṭhat a ṭul. Inpuahchahna hun ṭha a la awm a, Mizoram team hian camp an neih ngei a ṭulin ka hria a, chumi tur chuan hma kan la ang," tiin a sawi.

Mizoram hi group B-ah inelna thlengtu Manipur bakah Tripura leh Nagaland te nen an awm a, Khuman Lampak Stadium, Imphal-ah an khel dawn. Group khat aṭangin team khat chiahin final round an lut ang.

Thlirna Tawi
Semifinal - October 28, Ningani
Mizoram Yellow 7 - 2 Bawngkawn GSA
MZY : Lalfakzuala 25', 65', 80'; Lalhriatpuia 14', 85'; David Lalchhunawma 20'; MS Dawngliana 73' (P)
BAW : Joseph 38'; Lalremruata 48' (P)

Mizoram Red 3 - 1 Tata Trusts COE
MZR : Lalrinchhana Tochhong 27';
Lalrinzuala Hauhnar 37'; Vanlalthanga 66'
COE : Linky 49'

Final - November 2, Thawhlehni
Mizoram Yellow 1 - 1 Mizoram Red
Penalty-ah Mizoram Yellow 5-3 in an chak
MZY : Lalhriatpuia 36' (P)
MZR : Lalrinzuala Hauhnar 59'