Thawh chhuah ngei kan tum - Guardiola

3rd November, 2021

Manchester City manager Pep Guardiola chuan Premier League lama an result ṭha lo chu siamṭhat nghal a duh. Spanish manager hian zanin dar 1:30-a Club Brugge nen Champions League an khelh tur chu an tan fiahna a nih tur thu a sawi.

UCL group A aṭangin Paris Saint-Germain an inlan dawn bawk. Paris club hi RB Leipzig mualah an lenglut dawn a, an player ṭha Lionel Messi dinhmun a chiang lo - Kylian Mbappe erawhin Thawhṭanni khan training a neih avangin a inlan theih a rinawm.

Fiahna
Guardiola enkawl Man City hi West Ham hneh loin League Cup aṭangin an tla a, anmahni mualah league match khel zui lehin Crystal Palace chu 2-0 in an ngam lo - defender pawimawh Aymeric Laporte hnawhchhuah a ni kha chhuanlam atan an hmang thei ang, mahse awmzia erawh a nei lo.

Pep-a chuan, "Season khat chhung chuan thil tam tak a thleng hman. Chet ṭhat lai, chet chhiat leh boruak fuh em em lai a awm thin. Hun harsa tawh lai pawha rilru put hmang a dik hi a pawimawh. Club Brugge nen kan inkhelh tur hi fiahna a ni dawn," tiin a sawi.

Spanish manager hian season tir khan hliam vangin Kevin De Bruyne a chhawr thei lo a, a lo kir hnuah beisei a la phak lo. Nikum lama a hman thiam Riyad Mahrez leh Raheem Sterling te aiin Jack Grealish leh Phil Foden a ring ta zawk a, tun thleng chu a la fuh chiah rih lo niin a lang.

Messi chiang lo
Mauricio Pochettino-a'n Lille an hneh ṭumin hliam damkawr Messi a chhawr lui a, chawlhlawk laiin thlak a ngai leh zui. Thawhṭanni khan Messi hian PSG training a zawm thei lo a, zanina German club nen an inhmachhawn hun atan a dinhmun a chiang lo.

Messi hian Leipzig nen an intawn hmasakin goal hnih a khung, hun tawp dawna an penalty hmuh chu Mbappe a kian a, sawi zui a hlawh. Zaninah a inlan thei lo a nih chuan Leipzig tan thawk huaina tham a ni dawn.

Mahse, Messi inlan thei lo pawh ni se Mbappe-a'n training a nei pangngai leh tawh - Neymar nen an inkawp a nih chuan buaina tham an la ni tho. Poch tana rilru tibuai tur erawh Marco Verratti a damlo. Italian midfielder hmunruak hi hnawh khah a harsa ang.