Dortmund-in phuba an la thei ang em?

Champions League group C hmahruaitu tur zawnnaah Ajax-in 4-0 ngawtin Borussia Dortmund an sawp. Dutch club hian zanin dar 1:30 hian Signal Iduna Park-ah Dortmund an hmachhawn leh dawn a, an hneh nawn a nih chuan knockout stage an lut ang.

Dortmund hi hliam vangin an buai mek a, Ajax an hmachhawn hunah hian goal khung khawl Erling Haaland bakah Mahmoud Dahoud, Emre Can, Raphael Guerreiro, Giovanni Reyna leh Nico Schulz te an chhawr thei dawn lo.

Chutihrualin German club tan chhuanlam siam a thiang lo, Ajax hi an hneh lo nawn a nih chuan pahnihna nih pawh hi a harsa thei. Group C inkhel dangah zanin dar 1:30-ah Sporting Lisbon-in Besiktas an mikhual dawn. Portuguese club hian khualmualah 4-1 in Besiktas an hneh a, an chak nawn a nih chuan knockout stage luh beiseina a nung thar ang.