Everton ngam loh Jimenez awmna Wolves

Wolverhampton Wanderers chuan an mikhual Everton chu 2-1 in an hneh. Thawhṭanni zan Premier League inkhelah Max Kilman-a'n Wolves tana a goal hmasa ber a khung a, striker ṭha Raul Jimenez chuan chawlhlawk hmaa khung belh bawkin point thum an hlawh chhuak.

Rafael Benitez-a'n chawlhlawk laiin a naute a zilh nasa tih a lang, second half-ah chuan team ṭha zawk an ni. Mahse, minute 66-naa Alex Iwobi goal bak an neih belh thei lo, substitute Anthony Gordon khung tur chu keeper Jose Sa chuan ṭha zetin a dang.

Wolves hian an match hnuhnung zawka Leeds United an hmachhawn ṭumin, hun tawp dawn ṭepah goal an chhuah a, point thum hmu tur khan point hnih an hloh ṭhen - tun ṭumah chuan a tawp thlengin an inveng tluan thei.

Jimenez a la thiam
Season hmasa khan Arsenal defender David Luiz nen ball an inchuhna lamah Jimenez a inhliam a, hun rei tak chhung a chawlh a ngaih phah. A lo kir leh hnuah pawh lu tuamna a hman a ngai tawh a, goal khung a thiamna erawh a theihnghilh phah chuang lo.

Wolves tana Hwang Hee-chan goal khung chu VAR hmanga hnawl a ni phawt a, an goal pawm lo mah se Bruno Lage-a naute hi team hlauhawm zawk an ni. Kilman-a ball tauh chu Jordan Pickford chuan ho ang reng takin a chhuah zui.

England international Pickford hian Ruben Neves leh Francisco Trincao te khung tur ṭha takin dansak mah se, striker Jimenez-a'n cool zetin an goal hnihna a khung. England boss Gareth Southgate hmaah Pickford a che fuh meuh lo.

Mexican striker Raul Jimenez hian 2018 khan Benfica aṭangin Wolves a zawm a, a season hmasa pahnihah Premier League match 38 a khel thei. Season hmasa kha hliam vangin a inlan tam lo, kuminah chuan match 10 aṭangin goal hnih a khung leh ta.

Toffees an chuai
Everton hian an striker hriam ber Dominic Calvert-Lewin chu hliam vangin an la chhawr thei lo a, forward Richarlison erawh a lo kir leh tawh. Benitez-a'n tun hma lama hman lar 4-4-2 formation hmangin a naute a rem.

Spanish manager hian a naute a rem fuh vak lo niin a lang, hun chanve hma lamah phei chuan goal hlauhawm an nei thei lo, anmahni lamah goal hnih a lut zui - mualpho taka Wolves khelmual chhuahsan thei dinhmunah an ding hman.

Bench aṭanga Fabian Delph a luh hnuah Toffees lam boruak a kang hret. Keeper Sa-a tan hna thawh tur an siamsak ve ta zauh zauh a, amaherawhchu clear chance insiam an harsat - Arsenal player hlui Iwobi a vannei zauh tih mai loh chu sawi tur an nei tam lo.

Everton hian an match lehpekah chuan Tottenham an hmachhawn dawn, a awlsam lo khawp ang. Wolves pawhin Manchester City hnehtu Crystal Palace an tum ve leh thung dawn, an phur lai tak ni mah se Palace muala lenluh erawh thil awlsam a ni bik lo ang.

Eng nge an sawi?
Wolves manager Bruno Lage chuan, "Kan khel ṭha, point thum hmuh a hlut rual chiah hian ṭha taka kan khel thei kha a lawmawm zual lai chu a ni. Kan goal pahnih kha ngun takin en let ila, mimal thawhrah aiin team thawhhona ṭha a ni khan min tilawm.

"Inkhel ṭhenkhatah chuan vanduai chang kan nei, tun ṭumah erawh kawng engkimah kan vannei; 4-4-2 formation an rawn hman khan remchang kan hmuh theih phah, thluak hmang taka min beihna kan dang thei khan min tilawm," tiin a sawi.

Everton manager Rafael Benitez chuan, "Chak loh hi chuan lawmna tur a vang ṭhin. Hun chanve hma lama kan khel chhe lutuk kha kan tuar a, a hnu lama kan insiamṭhat tawhna kha chu a tlai zo tawh, siamṭhat vek theih a ni tawh lo.

"Player inhliam kan nei hian min tibuai deuh ṭhin a, squad chhah pawimawhzia chu kan hmu chiang. Inkhel harsaah hian bench aṭanga lut tur player ṭha leh tawnhriat nei kan mamawh a, chutiang zinga mi chu Delph kha a ni," tiin a sawi.