Number 1 nih tlang tum Djokovic

Novak Djokovic chuan world ranking chhuak tharah a chung ber dinhmun a luah chhunzawm. Serbian star hian number 1 ni chunga kum tawp hun hman tluan theih ngei a beisei thu a sawi chhuak.

Djokovic leh American legend Pete Sampras ten record inṭawm an nei mek, an record chu number 1 ni chunga season tawp vawi ruk hman theih a ni. Djokovic hi a chesual viau a nih ngawt loh chuan record thar siam thei tur dinhmunah a ding.

Kum 34 mi Djokovic chuan, "Point thlir mai chuan ka dinhmun a la ṭha tawk viau, chutih rualin inthlahdah erawh a thiang lo. Mimal khelh ṭhat ka ngaipawimawh viau a, chutiang bawkin kan ram tan Davis Cup ṭha taka khelh ka duh," a ti a, number 1 ni chunga season khar theih a in beisei.

Paris Masters khelh laiah Djokovic hi a inlan dawn a, ranking lama a elpui ber Daniil Medvedev pawh a tel. Novak hian hlawhtlinna a chang a nih chuan tuma elphak lohin ranking lamah pawh kumin atan a sang tlang tawh ang.