Real leh Inter tan dinhmun siam ṭhat hun

Real Madrid leh Inter Milan ten tun season Champions League-ah bul ṭan ṭha lo mah se match hnuhnung bera Shakhtar Donetsk leh Sheriff Tiraspol te an hneh avangin knockout stage lut turin an dinhmun a ziaawm. Europe club ṭha pahnih hian zaninah an khingpui ngaite bawk an hmachhawn leh a, dinhmun ṭha zawka ding turin chak an mamawh.

Zanin dar 11:15 hian Los Blancos-in an mual Santiago Bernabeu-ah Shakhtar an hmachhawn ang a, zanin dar 1:30-ah Inter Milan-in Bolshaya Sportivnaya Arena-ah Sheriff an tlawh ve bawk ang.

Real Thar
Carlo Ancelotti hnuaiah Real Madrid an indinthar a, tun hma angin Cristiano Ronaldo, Sergio Ramos leh player langsar ṭhahnem tawh lo mah se Europe-a champion pui theih tur squad chu an la kawl.

Shakhtar khelmual NSC Olimpiyskiy-ah Real hi 5-0 in an chak a, hemi ṭum hian Vinicius Junior-a'n goal hnih a khung. Brazilian forward hian kartawpa Elche 2-1 a an hneh ṭumin goal hnih a khung leh a, tun season inelna hrang hrangah goal kua khung tawhin kum 21 mi Vini Jr hi Real Madrid tana season li a khelh tawhah goal a la khung tam ber ṭum a ni der.

Vini Jr kawppui tur hian amah aia tawnhriat nei ṭha leh lar zawk Karim Benzema leh Eden Hazard te an awm. Ball chawmtu turte pawh Luka Modric leh Toni Kroos te an ni a, an tlarhnungah Bayern Munich rinrawl ni ṭhin David Alaba leh Eder Militao te an inkawp ang.

Shakhtar erawh an mualah 5-0 in tlawm mah se hemi hnu hian an ram inelnaah vawi thum khelin an chak vek vek a, inrintawkna an neih phah ang. Chutihrualin Ukrainian club hi Santiago Bernabeu-a ṭum hnih an khelh tawhah an tlawm ve ve tih hriat a ṭha.

Inter hi...
Real Madrid aia ngaihtuahawm chu Inter Milan an ni a, an khingpui tur Sheriff hian point ruk an hmuh tawh avangin Italian club tan chuan thih leh dam tiin a sawi theih. Inter hian an mualah 3-1 in hneh mah se 1-1 a ni hman a, awlsam taka chak an ni lo.

Season liam ta khan Inter Milan hian group stage an paltlang tawh lo a, table mawngphaha an awm avangin Europa League pawh an khel thei lo. Kuminah erawh Simone Inzaghi hoin knockout stage luh ngei an tum a, Moldovan champion Sheriff lakah an fimkhur erawh a ṭul ang.

Sheriff forward Adama Traore (8) leh midfielder Frank Castaneda (7) bakah midfielder Sébastien Thill (6) ten tun season-ah goal 21 an khung tawh a, Inter tlarhnung pawh an fimkhur a ṭul dawn a ni.