ATP Finals beiseitu Nadal

Rafael Nadal chuan Paris Masters lamah hlawhtling ta lo mah se beisei a la nei a, November 15 aṭanga khelh ṭan tur ATP Finals-ah a vawi khat nan nomawi chawi theih ngei a inring.

Grand Slam vawi 20 champion tawh Nadal hi a thiam pariat inelna ATP Finals bikah hian tun hmain a la hlawhtling ngai lo, tournament hi hard court a khelh a nih avangin beisei a phak lo deuh ṭhin pawh hi a mak hran lo.

World number 2 Nadal chuan, "Paris Masters kha kan thlir kir a nih chuan ka khel chhe hran loah ka ngai, hard court hmang thiam em em mai Alexander Zverev ka hneh lo a ni a, tun hma lama ka khelh dan nena khaikhin chuan a chhe hran loah ka ngai.

"Ka chak lo kha pawi ka tiin ka lawm lo, tumah chak loh laiin an lawm ngai lo. Mahse tun hma lam aia kan khel ṭha zawk a nih chuan lawmna tur a awm zel," tiin a sawi.

November 15-22 chhung hian O2 Arena, London-ah ATP Finals an khel zui dawn, a thiam pariat chu group pahnihah an ṭhen hrang dawn a, an inkhelh kual hnuah a sang pahnih ten semifinal an lut ang.

Nadal chuan, "Tun hma pawhin ATP Finals hi ka khel fo tawh, hun tam tak ka hman tawhna a nih avangin tawnhriat pawh ka ngah. Chutihrualin hlawhtling tur erawh chuan match zawng zawngah theihna sang ber hlan vek a ngai dawn," a ti.

Tennis ranking chhuak tharah Nadal hian pahnihna dinhmun a luah a, kum 2005 aṭang khan ranking chhuak thar a piangah a sang zual 10 zingah a awm thei ziah! Chawlhkar 790 chu a zawnin top 10 dinhmun a luah, ani aia record nei ṭha an awm lo hial.