Sharapova tan hmun a awm lo

French Open hmeichhe singles-ah player pali chiah an dam tawh a, world number 1 hlui Maria Sharapova tan hmun a awm ve lo. Grand Slam vawi hnih champion tawh Angelique Kerber pawh Simona Halep hneh loin a zinkawng a tawp ve bawk.

Nilaini zan Roland Garros, Paris-a inkhelah Sharapova hi Garbine Muguruza lakah darkar khat leh minute 10 chhungin 6-2, 6-1 in a tlawm a, world number 1 Halep pawhin Kerber lakah 6-7 (2-7), 6-3, 6-2 in hnehna a chang ve bawk.

Mangṭha Maria
Maria Sharapova hi hrem a nih vangin 2016 khan French Open-ah a inlan lo a, nikum khan wildcard pek a nih loh vangin a tel lo bawk. Kuminah beiseina sang tak nen a inlan a, 2015 Australian Open final a khelh hnuah inelna lianah semifinal a beisei sang hman hle.

A khingpui tur Serena Williams a inhnuhdawh bawk avangin Muguruza nen an intawn hma hian ni li chhung hahchawlhna hun a nei. Chutihrualin Muguruza pawh Lesia Tsurenko nen minute 20 chauh an inkhelh hnuah a khingpui hi hliam vangin a inhnukdawk bawk.

Inkhel ṭan tir lamah Sharapova a talbuai. Russian nula hian set hmasa berah double faults vawi thum a nei nghal, game thumna an khelh laiin vawi ruk ngawt an deuce hnuah Muguruza zawk a vannei leh bawk. Spanish nula hian an intawn hnuhnung pathuma a ngam loh lakah hnehna changin semifinal a inhlangkai.

Kum 31 mi Sharapova chuan, "Tournament khelh laiah player vannei leh vanduai bik a awm theih a, Serena nen an inkhelh loh tak avang khan ka dinhmun a ṭhat sawt ka hre chuang lo. Muguruza khan kei aiin a khel ṭha zawk a, a ball vuak a nain a dik bawk," tiin match khat a chawlh avanga dinhmun ṭha bik nia a inhriat loh thu a sawi.

Kerber a liam
Quarterfinal lehlamah champion thei tura rinkai pahnih an inkhel a, seeded pakhatna Halep chuan Kerber aia a huaisen zawkna ti langin hnehna a chang. German nula Kerber hian set hmasa berah vawi hnih ngawt a service chhuhsak mah se Halep-i'n 5-5 a ni pui leh thei, Romanian nula hian set la ta chiah lo mah se a hnuhnung pahnihah erawh a chungnung hle.

Australian Open leh US Open champion tawh Kerber hian kumin Roland Garros-ah set hloh miah loin quarterfinal hi a lut thei a, set hnihna a game hmasa berah a service hloh nghalin a tho chhuak tawh lo. Halep hian final vawi hnih a khelh tawhna hmunah tawnhriat nei ṭha zawk a nihna a lantir chiang hle.

Kum 30 mi Kerber hi Serena hneh chunga Grand Slam nomawi chawi thei a ni a, a thiam bakah thahrui a ngah avangin hmeichhe tennis rorel thei tura ngaih a ni hman. Mahse, German nula hian season hmasa khan beisei a phak lo, tun ṭumah hian seeded 12-na niin khel ṭha viau mah se hard court lama a hlauhawm ang chuan clay court-ah a khel chhuak zo lo.

World number 1 Halep leh Muguruza te hian nizan khan semifinal an khel zui a, 2017 US Open finalist Sloane Stephens leh Madison Keys te pawhin final luh an inchuh bawk–he thu buatsaih lai hian result kan hre hman lo a ni.