Salah tel lohna Egypt hnehtu Belgium

World champion nih beisei Belgium-in Egypt laka hnehna chang turin harsatna an tawk lo a, Mohamed Salah tel loa khel Arab ram hi 3-0 in an sawp.

Brussels-a inkhelah mualneitu team-in goal khung turin harsatna an tawk lo. Minute 27-na lekah Eden Hazard-a'n goal-ah ṭha zetin a shot a, Egypt keeper Essam El-Hadary chuan lo dang per hman mah se a let lehlam hi Manchester United striker Romelu Lukaku chuan a pet goal.

Hazard-a'n minute 11 hnu lawkah Belgium innghahna a nihzia a pholang nawn a, Yannick Carrasco ball siamsak chu hnai set sawt aṭangin a pet goal.

Belgium-in inkhel an thunun tluan chhuak zak a, hun pek belah an chak nemngheh nan Marouane Fellaini chuan goal thumna a khung a, 3-0 in an chak.

Egypt-in Mo Salah an mamawh zia a lang nawn a, hetihrual hian Belgium-in champion tum ngam turin theihna an nei sang tawk tih hmuh tur a awm bawk.

Belgium coach Roberto Martinez tan inkhel hmuhnawm tak a ni ngei ang. Hazard-a'n a thiam ngaiin a la thiam reng a, Dries Mertens leh Kevin de Bruyne che vel a hmuhnawm a, Lukaku leh second half-a amah thlaktu Michy Batshuayi te an khel ṭha hle bawk.