Durant-a'n Cleveland a hnuaichhiah

Golden State Warriors tan tun hnai season li chhunga NBA champion vawi thum ni turin match khat bak chak a ngai tawh lo. Golden State hian nimin zing khan Kevin Durant-a point 43 score hmangin Cleveland Cavaliers chu anmahni mualah 110-102 in an luhchhuah a, best-of-seven series-ah 3-0 in hma an hruai–Inrinni zing dar 6:30-ah Game 4 khelh leh a ni ang.

Quicken Loans Arena-ah Cleveland lamin ṭantu an nei ṭha a, an thiampuipa LeBron James-a'n dunk ropui lantirin a tir lamah 16-4 ngawtin an sang fal hman. Tyronn Lue naute hian chawlhlawk laiin point rukin hma an hruai fal a, match hmasa pahniha an tlawm tawh avangin an thochhuak dawn niin a ngaih theih.

Mahse, quarter thumna bikah Warriors lamin 31-23 ngawta bei letin, quarter hnuhnung ber an khelh dawn chuan mikhual tem zawkin an dinhmun an sawhnghet leh tawh. Team pahnih an inbei tawh a, an mualah Cavs-in tlawm an tum lo. Hun tawp nan 49.8 seconds chiah a awm tawh tihah Durant chuan 3-points vawm lutin a team chu dinhmun himah a dah.

Game 2-a record siamtu Stephen Curry-a'n point 11 chauh neiin, Klay Thompson leh Draymond Green ten point 10 bak nei thei lo mah se hnehna an chan theih nan Durant a thiam tawk. NBA Fianls-ah hian eng team mah 3-0 a nih hnuah an la thochhuak leh ngai lo, Steve Kerr-a naute dinhmun a ṭha tawh hle.

Season hmasa khan Golden State hian Cleveland lakah bawk hian 3-0 in hma an hruai a, game 4-ah chak lo mah se game 5-ah hnehna changin nomawi an chawi. Kuminah pawh GSW hian khualmuala champion ai chuan anmahni mual ngeia ropuina chan an duh a nih pawhin a mak lo ang. Chutihrualin an dinhmun ṭha tawh hle mah se an champion tihna a la ni bik lo.