Champions League ; Europe inelnaah sum a pun belh
UEFA hnuaia club football inelna ngaihhlut hlawh Champions League, Europa League leh UEFA Super Cup khel te pawisa hmuh chu pound maktaduai 787 ngawtin a pung dawn!
Season hman zawh takah khan heng inelna pathuma inlan club te chuan pound tluklehdingawn 2.06 an dawng a, season thar aṭanga hman ṭan turin pound tluklehdingawn 2.84-ah tihsan a ni.
Madrid = sum
UEFA-in dan thar a puan ruala hlawkna tel hmasa ber tur club chu Madrid khaw club pahnih an ni. August-ah UEFA Super Cup khelh a ni dawn a, Real Madrid leh Atletico Madrid an intawng dawn.
Real hian Champions League final-ah 3-1 in Liverpool an hneh a, Atletico hian Europa League final-ah 3-0 in Marseille an hneh thung.
UEFA Super Cup an khelh dawn avangin club pahnih hian pound maktaduai 3.06 ve ve an dawng dawn a, hnehna chang zawkin £870,000 an dawn belh ang.
Sem sem dam dam
Champions League-a sum sen tur hi hmun liah ṭhen a ni a, chu chu Starting fee, Fixed amounts, Coefficient ranking leh Market pool ti tea ṭhen hran an ni.
Starting fee hi Champions League khel tura inpetkai hrim hrim club 32-in an dawng dawn a, club tinin pound maktaduai 13.34 ṭheuh an dawng ang.
Fixed amounts hi group stage-a an khelh dan a zira sum sem tur a ni leh a, match vawi khata hnehna chan zelah a chak zawk team-in pound maktaduai 2.36 an dawng ang a, draw result-ah £787,000 an insem dawn thung.
A sang sang
Inelnaa a thleng sang apiangin an sum dawn a tam dawn. Round of 16 inpetkai club te chuan pound maktaduai 8.31 ṭheuh an dawng ang a, quarterfinal lutin pound maktaduai 9.19, semifinal lutin pound maktaduai 10.5 an dawng ang.
Final lut team pahnih chuan pound maktaduai 13.12 ve ve an dawng ang a, champion team chuan final luh vanga an sum dawn bakah hian pound maktaduai 3.5. an dawn belh dawn bawk.
Market pool an tih hi television market aṭanga club sum dawn tur a ni a, sem ral turin pound maktaduai 255.5 an dah. Market pool sum hi club-te awmna national television market a zira sem tur a ni.
Coefficient ranking
Kum 10 chhunga club chet dan a zirin Coefficient ranking siam a ni dawn a, UEFA Champions League/European Champion Clubs' Cup, UEFA Europa League/UEFA Cup leh Cup Winners' Cup champion-na apiangin bonus point keng chungin he ranking hi siam a ni.
Hemi pual hian Coefficient share tih hmangin pound maktaduai 513.80 chu budget-ah dah a ni a, Champions League-a inlan club 32-in an ranking mila an insem tur a ni. Ranking hniam ber chu £970,000 pek tur an ni a, a chung chiahin a dawn let chiah a dawng zel ang. Chumi awmzia chu ranking-a pakhatna chuan pound maktaduai 31.26 an dawng ang.
Hetihlai hian Europa League lamah pawh sum nasa takin a pung dawn a, season hmasaa pound maktaduai 350 chu 490-ah tihsan a ni.