European league te an hlu!
Deloitte chuan 2016-17 season a European league sang zual panga te a zirchianna a ti chhuak a, English Premier League, La Liga, Bundesliga, Serie A leh Ligue 1 ten 2016-17 season a sum an lakluh zat chu pound tluklehdingawn 12.6 a ni.
Zirchianna aṭanga a lan danin 2015-16 season aia league lian panga te sum lakluh punna zat chu 9% ngawt a ni a, European football market hlut zawng chu pound tluklehdingawn 21.9 lai niin record a tling.
Premier League club te chu sum lalut hnem ber an ni a, club 20 ten an club record ṭheuh siama sum an lakluh avangin pound tluklehdingawn 4.5 ngawt an lalut! Premier League-in anmahni hnaih bertu Spanish La Liga aia an lakluh tam zawkna chu 86% a ni.
English top division te hlawkna leh sum lakluh tam chhan hi Financial Fair Play regulations leh Premier League-in club te sum hman dan an 'control' vang a ni.
Deloitte sport business group head Dan Jones chuan, "Kum 10 vel liam ta maiah kha chuan Premier League club zinga 60% chu hloh hlirin an kal a, 2016-17 season-ah erawh hlep an nei vek tawh a ni," tiin a sawi.