Spain leh Portugal elpui turin Morocco leh Iran
Cristiano Ronaldo telna Portugal chu Europe-a champion lai an ni a, amaherawhchu Russia-a FIFA World Cup khelh a nih hunah chuan 2010 WC champion Spain chu rinkai zawk an ni dawn. Group B-ah Europe ram pahnih tan knockout stage lut turin harsa tur a awmin a lang lo a, chutihrualin Asia ram aṭanga tling hmasa ber Iran leh Morocco ten a tikimtu nih ringawt an tum lo.
Ronaldo leh Portugal
Portugal-in qualifier match hmasa berah Switzerland an hneh lo a, amaherawhchu hemi hnua an match zawng zawngah hnehna an chan vek avangin group hmahruaitu an ni pha tho. Ronaldo leh Andre Silva te inkawp chuan goal 24 an khung.
Fernando Santos hoten hian FIFA World Cup 2014 hnuah competitive match-ah vawi hnih chauh an khingpuite an hneh lo a, Real Madrid forward Ronaldo a tel lo ve ve. Portugal hi an captain chungah an innghat nasa tih a lang a, tun inelnaah pawh hian Ronaldo chet ṭhat leh ṭhat loah an hmalam hun a innghat thui hle.
Iniesta hun hnuhnung
Spain-in Euro 2008 an champion hnuah WC 2010 leh Euro 2012-ah nomawi an chawi leh a, amaherawhchu WC hnuhnung berah champion lai nichungin first round an paltlang thei lo a, Euro 2016-ah last 16 bak an thleng lo bawk.
La Roja hian inelna lian hnuhnung pahnihah che ṭha tawk lo mah se an squad a chhah ṭhat avangin champion rinkai an ni a, Julen Lopetegui hnuaiah Premier League-a langsar Alvaro Morata, Cesc Fabregas leh Marcos Alonso te tan hmun a awm lo.
Spain hian qualifying-ah match kua chakin vawi khat an inhnehtawk a, tun ṭuma an
ṭhatna chu player naupang zawk Real Madrid midfielder Marco Asensio leh Atletico Madrid midfielder Saul Niguez te an hman tlak tawh a, Isco-a'n a vanglai a hmang chho a, tawnhriat nei Sergio Busquets, Andres Iniesta leh David Silva ten an la ho thei bawk. World Cup-a an champion ṭuma chakna goal khungtu Iniesta tan ram tana a hun hnuhnung a ni dawn a, hei hian player-te a fuih phur lehzual ang.
Morocco leh Iran
Morocco manager Hervé Renard-a'n Africa Cup of Nations-ah Zambia (2012) leh Ivory Coast (2015) te a champion pui tawh a, French manager hoin Morocco hi kum 1998 hnua a vawi khat nan World Cup khel turin an tling. Morocco hian Russia rama zin tur hian qualifying-a an match hnuhnung berah anni aia buk rit zawka ngaih Ivory Coast chu 2-0 in an hneh thei a, World Cup khel tura an tlin danin an ram mipui a hneh a, team leh mipui phur mah se second round erawh an thlen theih a rinawm loh zawk.
Iran-in coach an nei ṭha a, Real Madrid manager hlui Carlos Queiroz hnuaiah tun hma zawng aiin an ṭha angin lang mah se ṭum li World Cup an khelh tawh ang thoin tun ṭumah hian knockout stage an thlen a beiseiawm loh. Chutihrualin Asia rama team ṭha ber zinga mi Iran hian Alireza Jahanbakhsh an kawl a, AZ Alkmaar winger hi Dutch league-a top scorer ni thei a ni a. Team Melli (Iran sawina) hian Sardar Azmoun an kawl bawk a, Russian club Rubin Kazan striker Azmoun hi tun World Cup-a mit titlai tur zinga mi a ni bawk.