English FA Chairman a bang

Khawvela ram mal football association ngaihven hlawh ber tih ngam, English Football Association chairman Greg Clarke chuan mi hang chungchang a sawi dan avangin a hna aṭanga banna a thehlut.

FA chuan thuchhuah siam nghalin Vice Chairman ni lai Peter McCormick chuan Chairman dinhmun a luah lailawk tur thu an puang a, chi inthliarna lam hawi thil reng reng an dem thu an sawi bawk. 

Greg Clarke hian mi hang player a sawi chungchangah, "Vun rawng nei player," tiin a sawi a, he a ṭawngkam hi vun rawng inthliarna lam hawia ngaih a nih avangin sawiselna nasa tak a tawk a, banna a thehlut ta a ni. 

FA Chairman hian UK sorkara Department for Digital, Culture, Media and Sport (DCMS) committee hnenah video kaltlangin mi hang player-ten social media kaltlanga hmuhsitna an tawrhna chungchang a sawi a, a ṭawngkam a lo uluk lo hret. 

Clarke hian, "vun rawng nei," tia mi hang ho a sawi bakah hian hmeichhe footballer, naupang zawkten an naupan laia goalkeeper nih an duh loh dante leh mawngkawhur chungchang mawi lo takin a sawi. 

Kum 63 mi Clarke hian South Asian leh Afro-Caribbeans ho chungchang a sawi bawk a, a ṭawngkam avangin bang tura nawrna a rik zui avangin banna a thehlut ta a ni. 

FIFA Vice President hna chelh teltu Clarke hian a ṭawngkam hman avangin ngaihdam a dil a, "Parliament hmaa ka thusawi khan kan game hmai a tibal a, theihtawp chhuah a he game-a an tel ve theihna tura kan beihte rilru ka hliam kha pawi ka ti takzet a ni," a ti. 

FA pawhin thuchhuah siamin, "Greg chu FA Chairman a nihna aṭangin a chawl ta a, Peter McCormick chuan a hmun ruak hi a luah lailawk ang," an ti a, FA Board chuan Chairman thar tur chu a hunah tak an ruat tur thu an sawi bawk. 

Leicester khaw chhuak Greg Clarke hian September 4, 2016 khan FA chairman hna hi a chelh ṭan a, he hna a chelh hma hian Cable & Wireless Communications group, Lend Lease Corporation leh O3b Networks-ah te CEO hna a lo chelh tawh a ni. 

FA Chairman bang boruak karah England national team pawh international break-a inlan turin an inpuahchah mek zel a, zanin dar 1:30 hian Republic of Ireland nen friendly match an khel ang. 

England hian Nations League an khel zui dawn a, November 15 zanah Belgium an lenchilh ang a, November 18 zanah Iceland an mikhual zui bawk dawn a ni. 

Nations League khel tur inpuahchah nan European ram langsarte chuan nizan lam khan friendly match an khel hlawm a, result kan hre hman lo - zaninah England tih loh ram langsar inlan tur an awm lem lo. 

England tan international break-a inlan turin Liverpool defender Trent Alexander-Arnold leh Southampton midfielder James Ward-Prowse-te chu koh ni mah se hliam vangin an inhnukdawk.

Player pahnih inhnuhdawh vang hian Jude Bellingham chu England senior team-ah a vawi khat nana koh a ni a, August 2019-a Birmingham tana a match hmasa ber kheltu midfielder hian a beisei aia chakin hma a sawn. 

Kum 17 mi midfielder hian nipui transfer-ah khan Birmingham City aṭangin Borussia Dortmund-a zawm a, tun season inelna hrang hrangah match 11 khel tawhin goal khat a khung a, assist vawi hnih a nei tawh bawk. 

England-in match thum an khelh tura pakhatah tal Bellingham hi a inlan a nih chuan Theo Walcott leh Wayne Rooney hnuaiah ram tana inlan thei naupang pathumna a ni dawn. 

Jude hian September 4 khan England Under 21 tan Kosovo a hmachhawn a, England U21 tana inlan thei naupang ber record a lo siam tawh - he tah hian Walcott record a khum.

Hetihlai hian Manchester United striker Marcus Rashford chuan hliam tenau vangin squad-a la zawm ve thei lo a, zaninah a inlan lo ang.