India tana match 50 kheltu Jeje
Mizo tlangval Jeje Lalpekhlua'n Ningani zan khan India tana a match 50-na a khel a, Blue Tigers tana match 50 khel thei player tlemte zingah a hming a nemkai ve leh ta.
Jeje-a'n Ningani zanah ram tana a match 50-na khelin second half-ah luhtir ni mah se India erawh hnehna a chanpui zo lo a, Intercontinental Cup-ah New Zealand chu 1-2 in an ngam lo.
Blue Tigers hian final an lut chiang tawh a, nomawi an inchuhpui tur erawh a la chiang lo. Nizan khan Kenya leh Chinese Taipei an inkhel a, he inkhel result a zir hian India hmachhawn tur a danglam thei dawn.
Pathianni zan dar 8:00-ah final hi khelh a ni dawn a, Mumbai Football Arena-a final khelh tur ticket hi Ningani khan hralh zawh a ni vek tawh - ram tan match 100 a khelh hma lawka Sunil Chhetri ngennain ngaihhlut a la hlawh reng.
Inthlak danglamna
India coach Stephen Constantine-a'n rinlawk ang ngeiin player a siksawi a, Chinese Taipei leh Kenya sawptu team aṭangin player pasarih ngawt starting XI-ah a thlak danglam.
Mizo tlangval Jeje Lalpekhlua pawh inkhel bul ṭantu zingah a tel lo a, English coach hian final ngaihtuah chungin Jeje hi chawlh hahdamna hun a pe a, Chennaiyin striker lawmpuina banner nena thawk chhuakte an hawihai.
Rin lawk ang ngeiin All Whites chu inkhel ṭantir aṭanga team hlauhawm zawk an ni a, Mumbai Football Arena-a inkhel entute thin thiin an awm meuh lo.
Andre De Jong-a'n vawi hnih ngawt chance duhawm a hlah a, Nikko Boxall hun neih chu Amrinder Singh chuan ṭha zetin a dang bawk. Chawlhlawk hma chiaha India tana hun ṭha neitu Chhetri-a'n a hun neih a chhawr bik lo.
Beiseina nen...
First half-ah goal lut loin chawlhlawk hman a ni a, Constantine-a'n bench aṭangin Jeje a luhtir. Hnahthial tlangval hi minute 90 inlan lo tluan tura ruahman ni zet mah se fans tam takin amah lawmna banner nen an hmuak karah India game-in beisei a phak loh bawk si avangin luhtir a ni a, final-a ropui taka a match 50-na khelh tum striker-in All Whites lakah a match 50-na a khel ta zawk.
Minute khat chiah a liam hman. New Zealand goalkeeper-a inthlahdah zauh a, a ball petchhuah turin Sunil Chhetri a per - a per lehlam hi All Whites goal-ah a lut a, khel ṭha lo zawk India-in hma an hruai.
Jeje hoin India-in theihtawp an chhuah chhunzawm a, beisei erawh an phak lo. Minute thum hnu lawkah De Jong-a'n New Zealand tan si phurh sutna goal a khung a, Moses Dyer chuan hun tawp nan minute li chiah a awm tawh tihin chakna goal a khung bawk.
Minute 90 pumpui thlirin Constantine-a'n a ti fuh lo tih hai rual a ni lo a, All Whites hmaah India an mualpho - kawng engkimah an phak lo. Ball kangah New Zealand an hmakhalh hleithei lo a, midfield lamah an inthlau bawk.
Mimal tihsual
India coach Stephen Constantine chuan mimal tihsual vanga chesual an nih thu a sawi. English coach chuan, "Kan tawnhriat ngah tawk lohna a lang a, mimal tihsual vangin goal hnih kan chhuah," a ti.
Blue Tigers coach chuan player pasarih a thlak danglam chhan sawifiahin, "Khelhna hun nei tam lo naupang zawkte tan chance kan siamsak a, Asian Cup inbuatsaihna a nih bawk avangin naupang zawkte hun ṭha siamsak hi a ṭul a ni.
"Final kan thlenvv tawh avangin tun hi inenchhinna atana ṭha tak a ni a, hnehna chan ngei duh ni ila ka starting XI kha a danglam ang," a ti.
India tan Jeje bakah Jerry Lalrinzuala chu hun tawp nan minute hnih chiah a awm tawh tihah tlan luhtir a ni a, Lalruatthara leh Laldanmawia Ralte ten bench lamah hun an hmang tluan thung.