Biakkima'n Olympic gold-medallist a hneh

Nimin tlai khan President's Cup-ah NT Lalbiakkima chuan Uzbekistani boxer Hasanboy Dusmatov chu unanimous decision-in a hneh a, light flyweight category (49 kg)-ah semifinal an lut. Vawiin tlai dar 3:00 hian Kazakhstan team B a mi Erzahn nen an inhnek leh ang.

Astana, Kazakhstan-a inelna neihah hian Mizo boxer Biakkima hian Thailand boxer ṭha Narinram Thani chu unanimous decision bawkin a hneh tawh a. Siaha boxer hian Olympic gold-medallist Dusmatov hneh tur pawhin harsatna a nei lo.

President's Cup hi June 5 khan ṭan a ni a, ni ruk chhung awh tur niin June 10, Pathianni hian a ṭiak ang.

Hlawhtlinna lian
Biakkima khingpui Dusmatov hi amateur boxing-ah chuan khawvel huapa hming langpha a ni a. Uzbek boxer hian kum 2013 khan Summer Universiade-ah gold medal a la a, kum 2015 leh 2017 khan Asian Championship-ah gold medal la lehin 2017 khan World Championships-ah silver medal a la.

Kum 24 mi Dusmatov-a chanchina sawi hlawh ber erawh Olympic gold medal a lak kha a ni a, 2016 khan Rio Olympic-ah Colombian boxer Yuberjen Martinez hnehin gold medal a la.

Uzbek boxer hian record a neih ṭhat avangin President's Cup tihlutu zinga mi a ni a, khawvel huapa boxer ṭha hi Mizo tlangvalin a tlawm a, Biakkima leh Mizo boxing tan hlawhtlinna lian a ni.

Tu nge Biakkima?
Biakkima hian kum 2010 aṭangin boxing a khel ṭan a, coach Vulṭhavunga hnuaiah SAI Mission Vengthlang-ah a inzir. Kum 2012 khan contender fight-ah inlanin final-ah Laldinmawia a hneh lo. Kum 2014 khan Pro Fight-ah lightfight weight-ah a champion a, hemi hnu hian Mizoram chhungah hneh loh tawng tawh loin kum 2017 thleng khan a champion.

Biakkima hian kum 2016 khan Navy a zawm a, boxing-ah hming chher zelin nikum October thla khan Senior National Championship, Visakhapatnam-ah silver medal a la. Hemi ṭum hian pakhatna ni pha lo mah se a chevel a hmuhnawm em avangin best challenger-ah thlan a ni.

National level-a a chet ṭhat avangin Biakkima hi India camp-ah koh a ni a, kumin January thlaa Boxing Federation of India-in ram 30 vel tana India Open a buatsaih ṭum khan bronze medal a la. Biakkima hi India camp-ah awm mah se ṭum thum zet foreign-a zin chhuak tur zingah a tel lo a, beidawng duh loa bei chhunzawm zelin a thawhrim rah a seng chho mek.