Ronaldo telna Portugal an chak

Portugal-in Cristiano Ronal­do tel loin Tunisia leh Belgium an hmachhawn tawh a, an inhnehtawkpui ve ve.

Champions League final khelh chauh avanga match hnih a inlan loh hnuah Ronaldo a inlan ve ta a, an thiampuipa a awm meuh chuan Europe champion hian 3-0 in Algeria an sawp.

World Cup khel tura inbuat­saih ve tho Uruguay-in Uzbe­kistan hneh turin harsatna an tawk lo a, Luis Suarez goal khung zanah 3-0 in hnehna an chang.

Ronaldo telna
Lisbon khawpuia inkhelah Portugal-in inkhel an thunun a, Ronaldo awm hnuah inrintawkna an nei sawt tih hmuh turin a awm. Mahse, Real Madrid forward hi a goal khung chu offside vangin pawm sak a ni lo.

Portugal tan player langsar chu Goncalo Guedes a ni a, kum 21 mi lek winger hian European champion tan World Cup-ah bul ṭan a phu tih pholangin goal hnih a khung. Bruno Fernandes chuan Ronaldo siamsak aṭangin a tauh lut bawk.

Guedes hian season hmasa khan Paris Saint-Germain aṭangin Valencia chu loan-in a pan a, match 38 a inlanah goal ruk a khung - Portugal hi World Cup Group B-ah Spain, Morocco leh Iran te nen an awmho.

Uruguay tan Suarez
World Cup khelh hmaa an match hnuhnung berah Uruguay tan Suarez chuan penalty aṭangin a chhuih lut a, Barcelona forward goal khung hma hian Giorgian De Arrascaeta chuan yard 15 vel aṭangin a pet goal a, Jose Maria Gimenez chuan a pet goal ve bawk.

Uruguay hi an match thum chhung a zawnin an chak ta a, an match hnuhnung pathumah vawi khat chiah an tlawm bawk. Suarez baka Edinson Cavani nei bawktu ram hian inrintawkna nasa tak nen Russia an pan ang.

Hetihlai hian Iceland chuan 3-2 a Norway an hneh loh hnuah Ghana lakah an insiamṭha lo a, 2-2 in an inhnehtawk. Argentina, Croatia leh Nigeria te nena group khata awm tur team tan Russia-a last 16 lut tur chuan insiamṭhat a ṭul.