Nomawi inchuh tur Halep leh Stephens

Zanin dar 6:30 hian Philippe Chatrier Court-ah French Open 2018 hmeichhe singles final khelh a ni dawn a, world number 1 Simona Halep leh US Open champion lai Sloane Stephens ten nomawi an inchuh ang.

Ningani zan khan semifinal khelh a ni a, seeded pakhatna Halep hian Garbine Muguruza chu 6-1, 6-4 a sawpin a vawi thum nan Roland Garros final a in vaw kai. American pahnih inkhelah Sloane Stephens chuan a ṭhian ṭha tak Madison Keys lakah 6-4, 6-4 in hnehna a chang ve bawk.

A vawi thum nan
Simona Halep hian 2014 leh 2017 French Open-ah final a lut phak a, mah se a chak lo zawkah a ṭang ve ve. Kumin Australian Open-ah khan final a in vaw kai leh a, ṭum dang ang thoin pahnihna a ni leh–tun ṭumah hian a vawi li nan major tournament final a khel dawn.

Romanian nula hian ranking sang ber nichungin Paris a pan a, match ruk a khelh tawhah set hnih chiah hloh chungin final a thleng thei. Tun hma lama Maria Sharapova, Caroline Wozniacki leh Jelena Ostapenko te laka a vanduai tawhna ang thlen nawntir a tum lo khawp ang.

Kum 26 mi Halep chuan, "Nitin mai hian ka khel ṭha tual tual a, chu chuan min tihlim hle a ni. A bik takin Garbine lakah kha chuan tun hnaia ka match ṭha ber ka khel chhuak a ni," tiin a sawi.

Beisei a neih thu sawi zuiin Halep chuan, "Tunah chuan tawnhriat ka ngah tawh a, semifinal-a hnehna ka chan hi ka lawm rualin final atan rilru ka sawrbing a pawimawh a ni. Hahchawlhna hun kan ngah bawk a, rilru leh taksa inpeih takin final kan khel thei ang," a ti.

Stephens a tlang
American nula pahnih Sloane Stephens leh Madison Keys ten nikum khan US Open nomawi an inchuh a, ṭhian dun inkhelah Stephens a dingchang. Tun ṭumah pawh Stephens bawkin hnehna a chang a, set hloh loin hnehna a chang.

Seeded 10-na Stephens hian set hmasa zawk game thumnaah a khingpui service a chhuhsak a, set hnuhnung zawkah pawh Keys-i'n a service hmasa ber a hloh leh nghal a ni. Serena Williams leh Venus Williams ten 2002-a semifinal an khelh hnuah Stephens leh Keys te hi a ruala American player a thiam pali zinga tel leh thei hmasa an ni.

Kum 25 mi Stephens chuan, "Ṭhian ṭha leh hnam pui nena inkhelh chu engtik lai mahin a nuam ngai lo, chutih rualin ka khelh ṭhat em avang khan ka lawm hle. Tournament tam tak zinga ka ngainat tak pakhatah hlawhtlinna chan theihna hun ṭha ka nei leh ta a, final kan khelh turah hian ka theihtawp ka chhuah ang," tiin a sawi.