Ranking hniam ber Russia

FIFA ranking thar ber chu June 7 khan tihchhuah a ni a, World Cup thlengtu tur Russia chu inelna hmachhawn tur zinga ranking hniam ber an ni.

Russia hi thla hmasaa ranking tihchhuahah Saudi Arabia aiin sang mah se 66-na aṭanga 70-naa an tlak thlak avangin an group awmna group A bakah inelna hmachhawn tur team 32 zingah anni aia hniam an awm tawh lo.

S. Africa hnung zuitu?
World Cup vawi 20 khelh tawhah inelna thlengtu zinga group stage la paltlang lo awmchhun chu South Africa an ni. Kum riat liam ta khan South Africa hi Uruguay, Mexico leh France te nen group khatah awmin rinkai ber Les Bleus chungah awm mah se pathumna niin knockout stage an lut lo.

Tun ṭum inelnaah hian a thlengtu Russia hi group A-ah Uruguay, Egypt leh Saudi Arabia te nen an awm. Coach Stanislav Cherchesov hote awmna hi group awlsam niin lang a, amaherawhchu tun hnaia an result thlirin a harsa dawn tih a lang. Russia hian match hnuhnung paliah chak an nei lo a, World Cup hmaa an match hnuhnung bera Turkey nen 1-1 a an inhnehtawk a, hemi hma hian Austria (0-1), France (1-3) leh Brazil (0-3) te an hneh lo.

Russia tan match hmasa bera Saudi Arabia leh a dawttua Egypt nen an inkhel tur a pawimawh dawn. Champions League final-a inhliam Mohamed Salah dinhmun chu Egypt-in an ngaihven ang thoin Russia lam pawhin Liverpool forward chungchangah an beng an chhi kar dawn a, ram pahnih duh dan erawh a inang kher lo ang.

Team dang hi...
World Cup champion lai Germany chuan pakhatna dinhmun an hauh a, Mizote ngaihven England pawhin hma sawn hretin Denmark nen 12-na dinhmun an hauh.

Vawi nga champion tawh leh champion tura rinkai zinga mi Brazil chuan pahnihna dinhmun an hauh a, Belgium chuan pathumna dinhmun hauhin Europe champion Portugal leh Lionel Messi telna Argentina te chu a sang panga zingah an lang.

World Cup khel lo tur zinga ranking-a sang panga te chu Chile (9th), Netherlands (17th), Wales (18th), Italy (19th) leh USA (25th) te an ni a, inelna tihmuhnawm thei tur vek an nih avangin an tling zo lo hi an uiawm hle.

India pawhin 97-na dinhmun an hauh chhunzawm zel a, point lamah erawh point liin an tlahniam a, an chung chiaha awm Georgia leh an hnuaia awm Qatar nen an inkarah point hnih ve ve a awm.