World Cup khel turin England inpeih

England chuan Russia ram an pan hmaa an match hnuhnung ber chu Ningani zan khan Elland Road-ah an khel a, Marcus Rashford leh Danny Welbeck te goal hmangin Costa Rica 2-0 in an hneh.

Three Lions hi FIFA World Cup-ah Belgium, Tunisia leh Panama te nen group G-ah an awm a, June 18 hian an match hmasa berah Tunisia an hmachhawn ang.

Southgate tan lawmna
England hian Costa Rica an hmachhawn hma hian Nigeria 2-1 in an hneh tawh a, Gareth Southgate chuan friendly match pahnih hi player enchhin nan a hmang.

Costa Rica nen hian captain Harry Kane chu hahdamtirin Jordan Henderson chuan captain armband a hreng a, Manchester City defender John Stones chiahin bul a ṭan nawn.

Ṭan phat aṭangin England khel a nung a, Rashford chu tlarhmaa hlauhawm ber a ni a. Manchester United rawlthar hian minute 13-naah box pawn aṭangin kawh pawta petin keeper Keylor Navas-a'n a en liam.

Three Lions inkhel a nung a, substitute Danny Welbeck chuan minute 76-naah a tauh lut ve bawk a, inkhel thunun chungin 2-0 in an chak.

Rashford an fak
England boss Southgate chuan, "Team chhunga inelna thianghlim awm hi kan mamawh a, kar thum chhung inpuahchahna ṭha kan neih kan hlawkpui bawk. Player 10 thlak danglam chungin ṭha takin kan khel a, player-tinin an khelh dan tur an chiang," tiin a naute khelh danah a lawm thu a sawi.

Rashford chungchang sawiin Soutgate chuan, "Marcus hian chet ṭhat a duh tak zet a, United-ah pressure a neih nasat avangin a bulah pawh tihsual a pawi loh thu leh zalen taka khel turin kan fuih a. Tihsual nei miah lo player chuan risk an la lo tihna a ni a, chuvangin ngampa taka khel turin duhsakna kan hlan a, Rashford khan a ṭhatna tak angin a khel chhuak a ni," tiin a fak.

English media lam chuan Tunisia nena an inkhel tur thlirin United forward Rashford leh Man City forward Raheem Sterling te an buk zui a. Kum 20 mi Rashford hian ram tan vawi 19 a khelh tawhah goal thum a khung a, kum 23 mi Sterling hian ram tan vawi 38 a khelh tawh aṭangin goal hnih chiah a khung a, match 20 chhung goal khung tawh loin a goal khung hnuhnun ber chu Estonia lama October 2015-a a khung daih tawh kha a ni.

Engtin zel?
England-in Costa Rica an hneh ṭum hian Liverpool right back Trent Alexander-Arnold chuan ram tan a vawi khat nan inkhel bul a ṭan a, hmabak êng tak a nei tih a pholang. Chelsea midfielder Ruben Loftus-Cheek pawh a khel ṭha a, Fabian Delph pawhin City tan left back-ah inlan ngun mah se midfielder ṭha tak a la ni reng tih a lantir bawk.

Liverpool captain Jordan Henderson chuan, "Costa Rica nen kan inkhelh ṭum anga kan khelh zel theih chuan eng team pawh kan hneh thei a ni. Inpuahchahna kan nei ṭha a, ṭha lehzuala inpuahchahna hun kan la nei bawk," tiin World Cup khel tura an inpeih tawh thu a sawi.