Sanga'n Chhinga Veng ho dawn

Mizoram Premier League champion lai Chhinga Veng chuan season liam taa nomawi lak theih zawng zawng lakpuitu coach Lalsangzuala Hmar leh assistant coach Anand Gurung an chelh.

AFC B Licence nei Sanga hnuaiah hian Chhingcows hian nomawi an chawi ringawt lo a, inelna an thunun bawk. MFA Super Cup leh I Day Football-a champion turin an khingpui an hneh vek a, chak loh nei loin match 22 lai an kaltluang bawk.

Santosh Trophy-a Mizoram coach Sanga chuan, "Season hmasaah khan kan inlungrual a, kan thawhhona a ṭha a, team angin kan ṭangrual a, kha kha kan chakna hnar a ni. Club hruaitute leh veng mipui (fans) ten min duatin min support ṭha em em a, khatiang kha kan chhawmnun leh zel ka beisei a ni," tiin a sawi.

Chhinga Veng hian an champion theihna kawnga an player pawimawh striker Malsawmfela, defender Laldinliana leh keeper Lalmuanawma te an chan a, player pawimawh dang forward pahnih MS Dawngliana leh Lalrammuanpuia, defender K. Lalthlahlova leh keeper Zothanmawia te erawh an chelh thei thung.

MFA hnuaia club-te tan tun thla hi transfer hun a ni a, MPL club bakah District hnuaia club-ten player an zawng chho a, tualchhung transfer a ngaihnawm chho hle.